काठमाडौँ । प्रधानमन्त्री शेरबहादुर देउवाले एमसीसी पारित गर्ने सम्बन्धमा कुनै नाफाघाटा हेर्न नहुने बताउनुभएको छ । नेपाली कांग्रेस संसदीय दलको मङ्गलबार बसेको बैठकमा सो पार्टीका सभापति देउवाले नेपाली कांग्रेस जिम्मेवार राजनीतिक दल हो भन्दै यस्तो अवस्थामा जिम्मेवार राजनीतिक दलले क्षणिक लाभ वा हानिलाई आधार बनाएर एमसीसी सन्दर्भमा धारणा बनाउन नहुने बताउनुभयो ।
एमसीसीबारे कम्युनिष्ट पार्टीहरुले दोहोरो चरित्र देखाएको भन्दै उनीहरुले सत्तामा रहँदा एउटा कुरा गर्ने र सत्ताबाहिर भएपछि अर्कै कुरा गरेको बताउनुभयो । नेपाली कांग्रेस जतिको प्रष्ट धारणा राख्ने पार्टी नेपालमै नभएको उल्लेख गर्दै उहाँले एमसीसीबारे नेपाली कांग्रेसको धारणा हिजो जे थियो आज पनि त्यही रहेको स्पष्ट गर्नुभयो ।
एमसीसी पारित गर्न षड्यन्त्र भएको भन्ने एमालेको भनाइप्रति उहाँले नेकपाको सरकार हुँदा केपी शर्मा ओली आफैँले एमसीसी प्रस्ताव संसद्मा ल्याएकाले कसरी षड्यन्त्र हुन्छ भन्नुभयो । एमसीसी पारित गर्न एमालेले पनि सहयोग गर्नुपर्ने उहाँको भनाइ थियो । प्रधानमन्त्री देउवाले एमसीसी टेबुल गर्नका लागि आफूले सभामुख अग्निप्रसाद सापकोटासँग कुराकानी गरिसकेको बताउनुभयो ।
