एजेन्सी । इन्डियन प्रिमियर लिग (आईपीएल)अन्तर्गत आज सातौं खेलमा गुजरात टाइटन्सले अरुण जेटली स्टेडियममा दिल्ली क्यापिटल्सविरुद्ध प्रतिस्पर्धा गर्दैछ । खेल साँझ ७ः४५ बजेबाट दिल्लीस्थित अरुण जेटली स्टेडियममा सुरु हुनेछ । पहिलो खेल हारेपछि दिल्लीको ध्यान यो सिजन पुनरागमनमा केन्द्रित हुनेछ । यस्तै, सिजनको पहिलो जितपछि गुजरातको मनोबल उच्च रहेको छ । दुवै टोली लिगको इतिहासमा दोस्रो पटक आमनेसामने हुँदैछन् ।
केन विलियम्सन घुँडाको गम्भीर चोटका कारण प्रतियोगिताबाट बाहिरिएका छन् । यसका बाबजुद पनि गुजरातका लागि यसले खासै फरक पर्दैन किनकि आजको खेलमा दक्षिण अफ्रिकाका डेभिड मिलर उपलब्ध हुनेछन् । लुंगी एनगिडी र एनरिक नोर्ट्या पनि दिल्ली क्याम्पमा सामेल भएका छन् ।
साविक विजेता गुजरातले जितसँगै सिजनको सुरुवात गरेको छ । घरेलु मैदानमा भएको पहिलो खेलमा उसले चेन्नईलाई ५ विकेटले पराजित गरेको थियो । शुभमन गिल र राशिद खानले राम्रो प्रदर्शन गरेका थिए । डीसी विरुद्धको टोलीमा चार विदेशी जोस लिटल, डेभिड मिलर, राशिद खान र अल्जारी जोसेफ हुन सक्छन् । यी बाहेक हार्दिक पाण्ड्या, शुभमन गिल, यश दयाल र मोहम्मद शामी जस्ता शीर्ष श्रेणीका भारतीय खेलाडीहरूले पनि टोलीलाई बलियो बनाउँदैछन् ।
प्रतियोगितामा दिल्ली क्यापिटल्सले सुरुवात राम्रो गरेन । टोलीले आफ्नो पहिलो खेल लखनउसँग ५० रनले हारेको थियो । टोली त्यो हार बिर्सेर यो खेलमा ध्यान केन्द्रित गर्न चाहन्छ ।
गुजरात विरुद्ध, टोलीका चार विदेशी खेलाडी डेभिड वार्नर, मिचेल मार्स, एनरिच नोर्ट्या र रोभम्यान पावेल हुन सक्छन् । यी बाहेक पृथ्वी शा, चेतन साकारिया र अक्षर पटेल जस्ता भारतीय खेलाडीले पनि टोलीलाई बलियो बनाइरहेका छन् ।
हार्दिक पाण्ड्याको कप्तानीमा रहेको गुजरात टाइटन्सको यो दोस्रो सिजन मात्र हो । पहिलो सिजनमा टोलीले सबैलाई चकित पार्दै उपाधि जितेको थियो । दुवै टोली लिग चरणमा एकपटक मात्र भिडेका थिए । उक्त खेल गुजरातले जितेको थियो ।
