काठमाडौँ । नेकपा (माओवादी केन्द्र) ले बारा–२ मा हुने उपनिर्वाचनमा जनता समाजवादी पार्टी (जसपा) का अध्यक्ष उपेन्द्र यादवलाई सघाउने भएको छ ।
तर चितवन–२ र तनहुँ–१ मा भने माओवादीले आफ्नै उम्मेदवार उठाउने तयारी गरे पनि ठोस निर्णय गरेको छैन । आगामी वैशाख १० गते उल्लेखित तीन निर्वाचन क्षेत्रमा हुने उपनिर्वाचनका लागि सोमबार उम्मेदवारी दर्ताको कार्यक्रम छ ।
बारा–२ मा यसअघि जसपाका रामसहाय यादव निर्वाचित हुनुभएको थियो । उहाँ उपराष्ट्रपति बनेसँगै उक्त निर्वाचन क्षेत्र रिक्त रहेको थियो । उक्त क्षेत्रमा सत्तारुढ गठबन्धनबाट जसपालाई नै सघाउने तयारी भएको छ ।
नेपाली कांग्रेस र माओवादी केन्द्रले उक्त क्षेत्रमा जसपाबाट उम्मेदवार बन्ने तयारीमा रहेका उपेन्द्र यादवलाई सघाउने निर्णय गरिसकेका छन् ।
