काठमाडौँ । शुक्रबार पनि प्रतिनिधिसभा विघटनविरुद्ध प्रतिपक्षी दल नेपाली कांग्रेसका सभापति शेरबहादुर देउवासहित १ सय ४६ जना सांसदले दायर गरेको रिट निवेदनमाथि सर्वोच्च अदालतको संवैधानिक इजलासमा सुनुवाइ जारी छ ।
सुनुवाइमा इजलासले प्रधानमन्त्री केपी शर्मा ओलीले जेठ ६ गते आफूलाई प्रतिनिधिसभाको विश्वास नभएकाले मार्ग प्रशस्त गरेको भन्दै राष्ट्रपति विद्यादेवी भण्डारीलाई अर्को प्रधानमन्त्री नियुक्तिका लागि प्रक्रिया सुरु गर्न लेखेको पत्रका बारेमा प्रश्न खडा गरेको छ ।
प्रधानन्यायाधीश चोलेन्द्र शमशेर जबराले निवेदक सांसदहरूका तर्फबाट बहस गरिरहेका कानुन व्यवसायीलाई प्रश्न सोधेका छन् ।
अधिवक्ता दिनमणि पोखरेलको बहस चल्दै गर्दा प्रधानन्यायाधीश जबराले, 'म विश्वासको मत लिन सक्दैन भन्ने ठाउँ संसद् हो कि राष्ट्रपति कार्यालय ?' भन्दै प्रश्न सोधे ।
जवाफमा अधिवक्ता पोखरेलले संसद्मा विश्वासको मत माग्न जानुपर्ने उल्लेख गरे । प्रधानमन्त्रीले आफूलाई अप्ठ्यारो परेको भन्ने लागे राजीनामा दिनुपर्ने उनको भनाई छ ।