काठमाडौँ । नेकपा (माओवादी केन्द्र) का नेता शिवचन्द्र कुशवाहाले पार्टी परित्याग गरी जनमत पार्टीमा प्रवेश गर्नुभएको छ । उहाँलाई जनमत पार्टीका अध्यक्ष डा। सिके राउतले स्वागत गर्नुभयो ।
रिपोर्टर्स क्लब नेपालमा आयोजित एक कार्यक्रममार्फत कुशवाहा जनमत पार्टीमा प्रवेश गरेपछि जनमत पार्टीले आगामी वैशाख १० गते हुने बारा–२ को उपनिर्वाचनमा पार्टीबाट उम्मेदवार बनाउने पक्का भएको बताइएको छ ।
पार्टी प्रवेश कार्यक्रममा कुशवाहले आफूलाई माओवादी केन्द्रभित्र सधैँ अन्याय गरिएको गुनासो गर्नुभयो । उहाँ ०६४ को संविधानसभामा निर्वाचित हुनुभएको थियो ।
गत मंसिर ४ गते सम्पन्न निर्वाचनमा उहाँ जनता समाजवादी पार्टी (जसपा) का रामसहाय प्रसाद यादवसँग पराजित हुनुभएको थियो । यादव उपराष्ट्रपतिमा निर्वाचित भएपछि रिक्त रहेको उक्त क्षेत्रमा आगामी वैशाख १० गते उपनिर्वाचन हुँदैछ ।
