काठमाडौँ । पाकिस्तानका ब्याटर अब्दुल्लाह शफिक टि–२० आईमा लगातार चार पटक डक आउट हुने पहिलो खेलाडी बनेका छन् । आइतबार अफगानिस्तानविरुद्धको खेलमा शफिक डक आउट भएका थिए ।
आइतबार शाहजाहमा टस जितेर पहिला ब्याटिङ गरेको पाकिस्तानले शफिकलाई पहिलो ओभरको तेस्रो बलमै गुमाएको थियो । उनी अफगानिस्तानका तीव्र गतिका बलर फजलहक फारुकीको बलमा एलबीडब्लू आउट हुँदै गोल्डेन डक पेभेलिएन फर्केका थिए । यो सँगै उनी लगातार चार खेलमा डक आउट भएका हुन् ।
टि–२० आई अन्तर्गतको पछिल्लो पाँच खेलमा उनले चार खेलमा खाता खोल्न सकेन्न । पहिलो खेलमा शफिक ४१ रनमा अविजित रहेका थिए । त्यसपछि न्युजिल्यान्डसँगको दुबै खेल र अफगानिस्तानसँगको पहिलो र दोस्रोमा गरि लगातार चार खेलमा डक आउट भए ।
यससँगै टि–२० आईमा चार पटक डक आउट हुने शफिक पहिलो खेलाडी हुन् । शफिकले टेस्टमा भने सानदार प्रदर्शन गरेका छन् । उनले १२ टेस्ट खेलमा ३ शतक र ४ अर्धशतकसहित ९ सय ९२ रन बनाएका छन् ।
पाकिस्तानले अफगानिस्तानविरुद्धको सिरीजअन्तर्गत भएको दुबै खेलमा खराब ब्याटिङका साथ ६ र ७ विकेटले पराजित हुँदै सिरिज गुमाएको छ । तेस्रो तथा अन्तिम खेल आज राती हुनेछ ।
