देउखुरी । नेपाली कांग्रेसले लुम्बिनी प्रदेशमा आफ्नै नेतृत्वमा सरकार बनाउने निर्णय गरेको छ । प्रदेशमा नयाँ गठबन्धनबाट नेपाली कांग्रेस र नेकपा (माओवादी केन्द्र) ले मुख्यमन्त्रीको दाबी गरिरहेको बेल कांग्रेस प्रदेश संसदीय दलको बैठकले आफ्नै नेतृत्वमा सरकार बनाउने निर्णय गरेको हो ।
संसदीय दलको शुक्रबार बिहान लुम्बिनीमा बसेको बैठकले कांग्रेसको नेतृत्वमा प्रदेश सरकार निर्माणको प्रक्रियालाई अगाडि बढाउने निर्णय गरेको हो । यसबाट सरकारको नेतृत्वमा दाबी गरिरहेको माओवादी केन्द्रलाई वर्तमान सरकारबाट बाहिर आउन दबाव परेको छ ।
नेकपा ९एमाले० का मुख्यमन्त्री लीला गिरीको नेतृत्वमा माओवादी केन्द्र अहिले सरकारमा रहेको छ । प्रदेशसभामा नेपाली कांग्रेस २७ सदस्यका साथ दोस्रो स्थानमा छ ।
शुक्रबारको बैठकपछि कांग्रेस संसदीय दलका नेता डिल्लीराम चौधरीले यसअघिकै गठबन्धनमा माओवादी केन्द्रले सरकारको नेतृत्व गरिसकेकाले अब प्रदेशको नेतृत्व नेपाली कांग्रेसले स्वाभाविकरुपमा पाउनुपर्ने बताउनुभयो । यद्यपि लुम्बिनी प्रदेश आफ्नो आधार इलाका भएको भन्दै माओवादी केन्द्रले यस प्रदेशको नेतृत्व सहजरुपमा छाड्न चाहिरहेको छैन ।
बिहीबार माओवादी संसदीय दलको बैठक बसेर सरकारलाई दिएको समर्थन फिर्ता लिने विषयमा आन्तरिक विवादका कारण उक्त विषयले बैठकमा प्रवेश नै पाएको थिएन ।
