एजेन्सी । स्पेनिस फुटबल लिग ला लिगा अन्तर्गत शीर्षस्थानको बार्सिलोनाले जित निकालेको छ । गएराति भएको एल क्लासिको भिडन्तमा बार्सिलोनाले चीरप्रतिद्वन्द्वी रियल मड्रिडलाई २–१ गोलले पराजित गरेको हो ।
बार्सिलोनाको घरेलु मैदान क्याम्प नोउमा भएको खेलमा सुरुवाती अग्रता भने रियल मड्रिडले लिएको थियो । खेलको नवौं मिनेटमा बार्सिलोनाका रोनाल्ड अराओले आत्मघाती गोल गरेका हुन् । रियलका भिनिसियस जुनियरले क्रस गरेको बललाई उनले हेड गर्दा आत्मघाती गोल भएको हो ।
यता ४५ औं मिनेटमा सजि रोबर्टोले गोल गर्दै बार्सिलोनालाई १–१ को बराबरीमा ल्याए । खेलको ८१ औं मिनेटमा रियलका मार्कोस एसेन्सिओले गरेको गोलले मान्यता पाएन । भिएआरको सहायताले हेर्दा उनी अफसाइड रहन पुगे । यस्तै, खेल सकिनै लाग्दा ९०.२ मिनेटमा फ्रांक केसेइले गोल गर्दै बार्सिलोनालाई जित दिलाए । अलेजान्ड्रो ब्लेडले क्रस गरेको बललाई सदुपयोग गर्दै उनले गोल गरेका हुन् ।
जितसँगै बार्सिलोनाले रियलसँगको अंकदुरी १२ अंकले बढाएको छ । २६ खेलबाट बार्सिलोनाले ६८ अंक जोडेको छ भने रियल ५६ अंकका साथ दोस्रो स्थानमा रहेको छ ।
