काठमाडौँ । तीन खेलको एकदिवसीय सिरिजको दोस्रो खेलमा अष्ट्रेलियाले भारतविरुद्ध सानदार जित निकालेको छ ।
आइतबार भीशकापट्टनममा भएको खेलमा घरेलु टोली भारत अष्ट्रेलियासँग १० विकेटले पराजित भएको हो ।
भारतले दिएको ११८ रनको समान्य लक्ष्य अष्ट्रेलियाले ११ ओभरमा विकेट नगुमाई पुरा गर्यो । अष्ट्रेलियाका लागि ओपनरद्वय मिचेल मार्स र ट्रेभिस हेडले अर्धशतकीय इनिङ्स खेले ।
मार्शले ३६ बलमा ६६ रन जोडे । उनले ६–६ चौका र छक्का प्रहार गरे । यस्तै हेडले ३० बलमा ५१ रन जोडे । उनले १० चौका प्रहार गरे ।
त्यसअघि पहिले ब्याटिङमा उत्रिएको भारतले २६ ओभरमा अलआउट हुँदै ११७ रन जोड्यो । भारतका लागि विराट कोहलीले ३५ बलमा ३१ रन जोड्दा अक्षर पटेल २९ रनमा अविजित रहे । यस्तै रविन्द्र जडेजाले ३९ बलमा १६ रन जोड्दा रोहित शर्माले १५ बलमा १३ रन जोडे । अन्य ब्याट्सम्यानले दोहोरो अंक जोड्न सकेनन् ।
अष्ट्रेलियाका लागि मिचेल स्टार्कले ५ विकेट लिए भने सिन एबोटले तीन तथा नाथन एलिसले दुई विकेट लिए । योसँगै सिरिजमा १–१ को बराबरी भएको छ । अब बुधबार हुने खेलले विजेता निर्धारण हुनेछ ।
