काठमाडौँ । सरकारमा सहभागी हुने निर्णय गरेसँगै नेपाली कांग्रेस प्रतिनिधिसभाको सत्ता पक्षको बेन्चमा बसेको छ । प्रतिनिधिसभाको आइतबारको बैठकमा सत्ता पक्षको बेन्चमा कांग्रेस बसेसँगै प्रतिनिधिसभाका दलहरुको आसन पनि फेरिएको छ ।
प्रमुख प्रतिपक्षीको बेन्चमा अब नेकपा (एमाले) बसेको छ । गत मंसिर ४ गते भएको प्रतिनिधिसभा निर्वाचनपछि प्रतिनिधिसभाको बैठकमा नेपाली कांग्रेस प्रतिपक्षको र एमाले सत्ता पक्षको बेन्चमा बस्दै आएका थिए ।
तर गत पुस २६ गते कांग्रेसले प्रधानमन्त्री प्रचण्डलाई विश्वासको मत दिए पनि ऊ प्रतिपक्षको बेन्चमै बसेको थियो । गत फागुन १७ गते बोलाइएको संसद् बैठकमा कांग्रेस र एमाले दुवैले प्रमुख प्रतिपक्षीको दाबी गरेका थिए ।
तर राष्ट्रपति निर्वाचनमा पुस १० गते बनेको सत्ता समीकरणमा परिवर्तन भएपछि एमाले प्रमुख प्रतिपक्षी दल बन्न पुगेको थियो । एमालेले प्रचण्ड नेतृत्वको सरकारबाट आफ्ना मन्त्रीहरुलाई फिर्ता बोलाएर सरकारलाई दिएको समर्थनसमेत फिर्ता लिएको छ ।
त्यस्तै सरकारबाट बाहिरिएसँगै समर्थन फिर्ता लिएको राष्ट्रिय प्रजातन्त्र पार्टी (राप्रपा) पनि प्रतिपक्षी बेन्चमा बसेको छ ।
