काठमाडौं । आज एक बजेका लागि आह्वान गरिएको संसद बैठकलाई लक्ष्य गरेर बानेश्वरस्थित संसद भवन वरपरको शान्ति सुरक्षाको अवस्थामा कडाई गरिएको छ । आज बिहानैदेखि बानेरश्वर वरपर मानिसहरुको आवतजावतमा पनि निगरानी राखिएको छ ।
बानेश्वर र बबरमहलसम्मको अवस्था निकै कडाई गरिएको देखिएको छ । यी क्षेत्रमा ठूलो संख्यामा प्रहरी तैनाथ छन् भने समूहमा हिँडिरहेका मानिसहरुलाई सोधपुछ समेत गरिएको देखिएको छ । आजको संसद बैठकमा एमसिसी परियोजना अनुमोदनसम्बन्धी एजेण्डा प्रस्तुत हुदैछ । यसैकारण सो क्षेत्रमा हुनसक्ने अवाञ्छित क्रियाकलापहरुलाई रोक्न यसो गरिएको गृह मन्त्रालयले जनाएको छ ।
मोहन वैद्य नेतृत्वको नेकपा (क्रान्तिकारी माओवादी), नेत्रविक्रम चन्द (विप्लव) नेतृत्वको नेपाल कम्युनिस्ट पार्टी, ऋषि कट्टेल नेतृत्वको नेकपा, आहुती नेतृत्वको वैज्ञानिक समाजवादी पार्टी र कर्णजीत बुढाथोकी नेतृत्वको नेकपा माओवादी केन्द्र समाजवादी र सीपी गजुरेल नेतृत्वको देशभक्त गणतान्त्रिक मोर्चा नेपालले बन्द आह्वान गरेको छ।
एमसिसी परियोजनाको विरोधमा उनीहरुले बन्दको आह्वान गरेका हुन् । बन्दका कारण आज बिहानैदेखि मानिसहरुलाई आवतजावत गर्न पनि कठिनाई भएको छ । बन्दको आह्वानकर्ताहरुले ठाउँ ठाउँमा जुलुश निकाल्नुका साथै बन्द गर्न आह्वान गर्दै हिँडेको देखिएको छ ।
यता सरकारले भने आजै सो सम्झौता संसदमा पेश गर्ने तयारी गरेको छ । अहिले ११ः३० बजे सभामुखले कार्यब्यवस्था समितिको बैठक बोलाएका छन् । सोही बैठकले कार्यसूचीमा परिवर्तन गरी उक्त सम्झौता संसदमा पेश गर्ने कार्यसूची बनाउने अनुमान गरिएको छ ।
