काठमाडौ । स्याङ्जा जिल्लाका प्रमुख पाँच राजनीतिक दलहरुले नेपाल सरकारले यस वर्षको बजेटमार्फत् कालीकण्डकी तिनाउ डाइभर्सन आयोजना राखेकोमा व्यापक असन्तुष्टि व्यक्त गरेका छन् ।
ती राजनीतिक दलहरुले नेपालमा शालिग्राम पाइने एकमात्र नदी कालीकण्डकी रहेको र नेपालको धार्मिक, सांस्कृतिक तथा अन्य धेरै हिसाबले अति महत्वपूर्ण रहेको र यस नदी किनारमा रहेका स्याङ्जामात्र नभएर नवलपरासी, चितवन लगायतका जिल्लाका नागरिकको उठिबास बनाउने भन्दै त्यसको विरोध गरेका छन् ।
नदीको प्राकृतिक बाटो नै परिवर्तन गर्नेजस्तो काम अप्राकृतिक भएको भन्दै ती दलका नेताहरुले सम्बन्धित सरोकारवालाहरुसँग परामर्श नै नगरी एकतर्फी रुपमा ल्याइएको यो आयोजना राष्ट्रिय हित बिपरीत भएको आरोप लगाएका छन् ।
कालीगण्डकी वरपर बस्ने बासिन्दाहरुको प्राकृतिक बसोबासलाई पनि असर गर्नेगरी ल्याइएको यो आयोजनाले देशलाई हुने भनिएको लाभभन्दा पनि मानवीय क्षति बढी हुने स्पष्ट देखिएको उनीहरुको भनाई छ ।
यसबाट निर्माण लागतभन्दा आर्थिक क्षति बढी हुने देखिएको भन्दै ती राजनीतिक दलहका नेताहरुको यो आयोजना कुनै पनि हालतमा गर्न नदिने बताएका छन् ।
नेपाली काँग्रेसका कार्यबाहक सभापति बुद्धिबहादुर राना, नेकपा माओवादी केन्द्रका संयोजक देवेन्द्र घिमिरे, नेकपा एमालेका अध्यक्ष रामचन्द्र भट्टराई, जसपा नेपालका अध्यक्ष ख्याम नारायण ढकाल, राजमोका अध्यक्ष राजेन्द्र गैह्रेले आज विज्ञप्ति प्रकाशन गरेर उक्त कालीगण्डकी डाइभर्सन आयोजनाको विरोध गरेका हुन् ।
