काठमाडौँ । नेपाली कांग्रेसका नेता विमलेन्द्र निधिले पहिलो चरणमा पुष्पकमल दाहाल प्रचण्ड प्रधानमन्त्री बन्नुभएपछि दोस्रो चरणमा नेकपा (एकीकृत समाजवादी) का अध्यक्ष माधवकुमार नेपाल प्रधानमन्त्री बन्नुहुने बताउनुभएको छ ।
नेपाली कांग्रेस ललितपुर नगर समितिले बिहीबार बिहान मंगलबजारमा आयोजना गरेको कार्यक्रममा उहाँले तेस्रो चरणमा मात्र शेरबहादुर देउवा प्रधानमन्त्री बन्नुहुने बताउनुभयो । निर्वाचन गराउने सरकारको नेतृत्व नेपाली कांग्रेसले गर्ने उहाँको भनाइ थियो ।
उहाँले दलहरुबीच भएको सहमतिअनुसार गठबन्धन सरकार पाँच वर्षसम्म कायम रहने बताउनुभयो । नेता निधिले उपराष्ट्रपतिको निर्वाचनलगत्तै प्रधामन्त्री प्रचण्डले विश्वासको मत लिने र त्यसपछि कांग्रेस सरकारमा जाने उल्लेख गर्नुभयो । नेपाली कांग्रेसले प्रचण्डलाई विश्वासको मत दिने उहाँको भनाइ थियो ।
कांग्रेसकै अग्रसरतामा एमालेसँगको गठबन्धनबाट नेकपा (माओवादी केन्द्र) मु्क्त भएको भन्दै उहाँले त्यसपछि नै नेपालको राजनीतिक कोर्स करेक्सनमा गएको बताउनुभयो ।
