काठमाडौँ । उपराष्ट्रपतिका उम्मेदवार रामसहाय यादवले विभिन्न दलका नेताहरुसँग भोट माग्न सुरु गर्नुभएको छ ।
चैत ३ गते हुने उपराष्ट्रपति पदको निर्वाचनका लागि सोमबार बिहान नेकपा (माओवादी केन्द्र) का अध्यक्ष एवं प्रधानमन्त्री पुष्पकमल दाहालसँग सिंहदरबारमा भेट गरी भोट माग्नुभएको हो ।
प्रधानमन्त्री प्रचण्डले उपराष्ट्रपति निर्वाचनबारे गठबन्धन दलहरुको बैठक बसेर थप निर्णय गर्ने आश्वासन दिनुभएको जनता समाजवादी पार्टी (जसपा) का सांसद प्रदीप यादवले बताउनुभयो । उहाँका अनुसार जसपा सांसद रामसहाय सत्ता गठबन्धनकै उम्मेदवार भएकाले योजनाबद्ध तरिकाले कसरी अगाडि बढ्ने भन्नेबारेमा निर्णय हुने प्रधानमन्त्री प्रचण्डले बताउनुभएको थियो ।
उपराष्ट्रपतिका उम्मेदवार यादवले यसअघि नेकपा (एकीकृत समाजवादी) का अध्यक्ष माधवकुमार नेपालसँग भेट गरी भोट माग्नुभएको थियो । भेटमा अध्यक्ष नेपालले उपराष्ट्रपति निर्वाचनका लागि सांसदहरुलाई प्रशिक्षण दिनेलगायतक विषयमा कुराकानी भएको सांसद यादवले बताउनुभयो ।
उपराष्ट्रपतिका उम्मेदवार यादवले आजै नेपाली कांग्रेसका सभापति शेरबहादुर देउवा र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनसँग भेट गरी भोट माग्ने कार्यक्रम रहेको बताइएको छ ।
उपराष्ट्रपतिका लागि ४ जनाको उम्मेदवारी परेको छ । निर्वाचन अधिकृतको कार्यालयले आइतबार अपराह्न अन्तिम उम्मेदवारहरुको अन्तिम नामावली प्रकाशन गरेको थियो । कार्यालयका अनुसार जसपाबाट रामसहाय यादवसँगै प्रमिलाकुमारी यादव, जनमत पार्टीकी ममता झा र नेकपा (एमाले) की अष्टलक्ष्मी शाक्यको उम्मेदवारी कायम भएको छ ।
यादवद्वय र झा सत्ता गठबन्धन दलमा आबद्ध हुनुहुन्छ ।
