काठमाडौं । जनता समाजवादी पार्टी (जसपा) की सांसद एवं उपराष्ट्रपति पदकी उम्मेदवार प्रमिला यादवले आफ्नो उम्मेदवारी फिर्ता लिने हुनुभएको छ । निर्वाचन आयोगले उपराष्ट्रपतिमा जसपाकै रामसहाय यादवको उम्मेदवारी खारेज गर्नु नपर्ने निर्णय गरेपछि अर्की उम्मेदवार यादवले उम्मेदवारी फिर्ता लिने हुनुभएको हो ।
पार्टी प्रवक्ता मनिष सुमनका अनुसार निर्धारित समयमै यादवले उम्मेदवारी फिर्ता लिनु हुनेछ ।
जनता समाजवादी पार्टी (जसपा) का सांसद यादवविरुद्धच नेकपा (एमाले) की उपराष्ट्रपतिकी उम्मेदवार अष्टलक्ष्मी शाक्य र जनमत पार्टीकी उपराष्ट्रपतिकी उम्मेदवार ममता झाले उजुरी दिनुभएको थियो ।
आफूविरुद्ध परेको उजुरीको जवाफ दिन नयाँ बानेश्वरस्थित संसद् भवन परिसरमा रहेको निर्वाचन अधिकृतको कार्यालयमा पुग्नुभएको थियो ।
आयोगले राष्ट्रपति र उपराष्ट्रपति फरक लिंग र समुदायका दुवै हुनुपर्ने अनिवार्य वा बाध्यात्मक व्यवस्था नरहेकाले यादवको उम्मेदवारी कायम राख्ने जनाएको छ ।
राष्ट्रपति खस आर्यतर्फको हुँदा उपराष्ट्रपतिमा यादव फरक समुदायको हुनसक्ने भएपनि खारेज हुनसक्ने भयले जसपाले प्रमिला यादवलाई पनि अघि सारेको थियो ।
