काठमाडौँ । सत्ता गठबन्धनको तर्फबाट राष्ट्रपतिको उम्मेदवार रहनुभएका रामचन्द्र पौडेलले राष्ट्रिय सहमति भएको बताउनुभएको छ ।
राष्ट्रिय स्वतन्त्र पार्टी (रास्वपा)ले पनि आफूलाई मत दिने निर्णय गरेपछि उहाँले यस्तो बताउनुभएको हो ।
मतदानस्थलमा सञ्चारकर्मीहरूसँग कुरा गर्दै पौडेलले भन्नुभयो, ‘अब लगभग राष्ट्रिय सहमतिमा पुगियो । हामी निर्वाचनको परिणामको प्रतीक्षामा छौ ।’
बिहान १० बजेदेखि सुरु भएको राष्ट्रपति निर्वाचन संघीय संसद भवनमा जारी छ । राष्ट्रपति निर्वाचनमा सङ्घीय संसद्तर्फ तीन सय ३२ र प्रदेशसभा सदस्य पाँच सय ५० गरी कूल आठ सय ८२ मतदाता कायम छन् । सङ्घीय सांसदको मतभार ७९ र प्रदेशसभा सदस्यको मतभार ४८ छ ।
