काठमाडौँ । राष्ट्रपति निर्वाचनको मतगणना आज बिहीबार अपराह्न ४ बजेदेखि सुरु गर्ने राष्ट्रपति तथा उपराष्ट्रपति निर्वाचन अधिकृतको कार्यालयले तयारी गरेको छ ।
मतगणनाको तयारीका लागि कार्यालयले राष्ट्रपतिका उम्मेदवारद्वय रामचन्द्र पौडेल र सुवास नेम्वाङका प्रतिनिधिसँग छलफल गर्ने भएको छ ।
बिहान १० बजे सुरु भएको मतदान अपराह्न ३ बजेसम्म हुनेछ । दिउँसो १ बजेसम्मको तथ्यांकअनुसार प्रदेशतर्फ ४४० मत खसेको छ भने संघीय संसद्तर्फ २९५ मत खसेको छ । बेलुका ७ बजेसम्म निर्वाचनको नतिजा आइसक्ने बताइएको छ ।
निर्वाचनमा प्रतिनिधिसभाका २ सय ७२, राष्ट्रिय सभाका ५९ र सातै प्रदेशसभाका ५ सय ५० गरी ८ सय ८१ मतदाताले भाग लिनेछन् ।
संघीय संसद् सदस्यको मतभार ७९ रहँदा प्रदेशसभा सदस्यको ४८ छ । राष्ट्रपतिमा नेपाली कांग्रेसबाट रामचन्द्र पौडेल र नेकपा एमालेबाट सुवासचन्द्र नेम्वाङ प्रतिस्पर्धामा छन् ।
