जनकपुरधाम । मिथिला माध्यमिकी परिक्रमाको अन्तिम दिन आज तिर्थालुहरू जनकपुरधामको अन्तरगृह परिक्रमा गरिरहेका छन् ।

पञ्चकोशी भनेर चिनिने यस परिक्रमामा जनकपुरधामको नगर परिक्रमा गरिन्छ । अन्तरगृह परिक्रमामा सहभागी भए १५ दिने माध्यमिकी परिक्रमा सरह फल प्राप्त हुने धार्मिक विश्वास रहेको छ । सोहीअनुसार अन्तरगृह परिक्रमामा पनि लाखौं भक्तजनले सहभागिता जनाउने गर्दछन् । अन्तरगृह परिक्रमामा लाखौं संख्यामा साधुसन्त, स्थानीयवासी तथा श्रद्धालुहरूको सहभागिता रहेको छ ।

धनुषाको ठेरा कचुरीस्थित मिथिला बिहारी मठबाट निस्केको मिथिला बिहारीको डोला तथा जनकपुरधामको सुन्दर सदनबाट निस्केको किशोरीजीको डोला नेपाल र भारतको विभिन्न धार्मिक स्थलको परिक्रमा गर्दै सोमवार जनकपुरधाम फर्केर विश्राम गरेको थियो । परिक्रमामा सहभागिहरूका लागि यहाँका स्थानीय संघसंस्था एवं युवा क्लवहरूले ठाँउ ठाँउमा नि:शुल्क स्वास्थ्य शिविर, चिया, खाजा लगायतका व्यवस्थापन गरेका छन् ।

अन्तरगृह परिक्रमामा सहभागी श्रद्धालु जनकपुरधामको गंगासागरलगायत यहाँका विभिन्न धार्मिक सरोवरहरूमा स्नान वा सेचन गर्दै रामजानकी मन्दिर एवं विभिन्न देवी देवताको मन्दिरमा दर्शन गरेर कदम चोकमा पुग्दछन् । पहिला त्यहाँ विशाल कदमको रुख थियो । हाल त्यहाँ पञ्चमुखी हनुमानजीको मूर्ति स्थापना गरिएको छ । कदम चोकमा पुगेर आफूले राखेको निशानी (पत्थर ) हटाएपश्चात लक्ष्मण सागरमा सेचन गरेर लक्ष्मण अखाडामा गदाको दर्शन गर्दै सो स्थानको धुलो उडाएर परिक्रमा समापन गरिन्छ ।

मिथिला परिक्रमाको धार्मिक मान्यता संसारकै सबै तीर्थहरू भन्दामाथि रहेको शास्त्रमा उल्लेख छ । परिक्रममा सहभागी स्थानीयहरुका अनुसार परिक्रमा गर्ने भनेको जनकपुरमा १५ दिन परिक्रमा गर्न नसकेपनि पञ्चकोशी परिक्रमा गरेर सो सरह फल प्राप्त हुने बताउँछन् । नाङ्गो पाउले भक्तालुहरुले परिक्रमा गर्दा भगवानको परिक्रम गरेको फल प्राप्त हुने मान्यता रहेको बताउँछन् । यो परम्परा धार्मिक हिसावले धेरै पुरानो परम्परा रहेको र यसको परिक्रमा गर्दा सुख शान्ति प्राप्त हुने विश्वास रहेको बताउँछन् । उनीहरुले परिक्रममा नेपाल र भारतबाट समेत धेरै भक्तजनहरु आउने बताए ।

जनकपुरधामको हनुमान नगरस्थित हनुमानगढीबाट विधिवतरूपमा शुरू भएको परिक्रमा भारतको कल्याणेश्वर, गिरिजास्थान हुँदै महोत्तरीको मटिहानी, जलेश्वर, ध्रुवकुण्ड, कञ्चनवन, धनुषाको पर्वता, धनुषाधाम, सतोषर, औरही हुँदै पुन: भारत बिहारको करूणा, विशौल हुँदै जनकपुरधाममा विश्राम गरेर अन्तरगृह परिक्रमा गरेसँगै मिथिलाको महाकुम्भ भनिने १५ दिने मिथिला माध्यमिकी परिक्रमा आज सम्पन्न हुँदैछ । अन्तरगृह परिक्रमा सम्पन्न भएको भोलिपल्ट होली खेल्ने प्रचलन छ ।