काठमाडौँ । यूएईमा जारी आइसिसी विश्वकप क्रिकेट लिग टू अन्तर्गतको त्रिकोणात्मक सिरिजमा नेपालले पपुवा न्युगिनीविरुद्ध रोमाञ्चक जित निकालेको छ ।
शुक्रबार दुबई इन्टरनेशल क्रिकेट स्टेडियममा भएको खेलमा नेपालले पिएनजीलाई तीन विकेटले पराजित गरेको हो । १८० रनको विजयी लक्ष्य पाएको नेपालले ४८ ओभरमा सात विकेटको क्षतिमा लक्ष्य भेट्टायो । नेपालका लागि आशिफ शेखले सर्वाधिक ८६ रनको योगदानी दिए ।
यस्तै, सन्दीप लामिछानेले ३५ रनको योगदानी दिए । सात विकेटको क्षति भइसकेको अवस्थामा आशिफ र सन्दीपले सम्हालिँदै नेपाललाई जित दिलाएका हुन् । आशिफ १३० बलमा ८६ रनमा तथा ५० बल खेलेका सन्दीप ३५ रनमा अविजित रहेका हुन् । यी दुई जोडीले आठौँ विकेटका लागि ७७ रनको साझेदारी गरेपछि नेपालको जित सम्भव भएको हो । नेपालबाट एकदिवसीय अन्तर्राष्ट्रिय क्रिकेटमा आठौँ विकेटका लागि यसअघि यति धेरै रनको साझेदारी भएको थिएन ।
यस्तै कुशल मल्लले २६ बलमा २३ रन जोड्दा नेपालका अन्य ब्याट्सम्यानले दोहोरो अंक जोड्न सकेनन् । पिएनजीका लागि अशाद भालाले तीन विकेट लिँदा सेसे बाउ र सेमो कमिआले दुई–दुई विकेट लिए । त्यसअघि टस जितेर पहिले ब्याटिङ थालेको पिएनजीले ४९.२ ओभरमा अलआउट हुँदै १७९ रन जोड्यो ।
पिएनजीका लागि टोनी उराले ३९ रन जोडे । ५१ बल खेलेका उनले २ चौका र १ छक्का प्रहार गरे । यस्तै, किप्लिन डोरिगाले ४३ बलमा २६ रन जोड्दा हिरी हिरीले ६३ बलमा ३१ रन जोडे । यसैगरी गाउडी टोकाले ४३ बलमा १५ रन जोड्दा सेसे बाउ ११ रनमा रनआउट भए । कप्तान अशाद भाला ११ रनमै पेभिलियन फर्किए ।
नेपालका लागि सोमपाल कामी र दिपेन्द्र सिंह ऐरीले दुई–दुई विकेट लिए भने सन्दीप लामिछाने, कुशल मल्ल र करण केसीको नाममा एक–एक विकेट रह्यो ।
