काठमाडौँ । राष्ट्रियसभाकी उपाध्यक्ष उर्मिला अर्यालले राष्ट्रपति विद्यादेवी भण्डारीको भूमिकाको आलोचना गर्नुभएको छ ।
बिहीबार संसदीय पत्रकारहरुसँग आफ्नै कार्यकक्षमा कुराकानी गर्दै उहाँले राष्ट्रपति भण्डारी नेकपा (एमाले) को मात्र राष्ट्रपति जस्तो बन्नुभएको र राष्ट्रपति संस्थालाई सम्मानित बनाउन नसकेको बताउनुभयो ।
राष्ट्रपति भण्डारीले नागरिकता विधेयकमा अनावश्यक राजनीति गरेको उल्लेख गर्दै उहाँले भन्नुभयो, “एक पटक विधेयक फिर्ता गरे पनि अर्कोपटक रोक्न मिल्थेन तर रोक्नुभयो।”
उहाँले नागरिकता विधेयक प्रमाणीकरण नहुँदा धेरैले नागरिकता नपाएको बताउनुभयो । राष्ट्रपतिले आफ्नो भूमिकालाई कार्यकारी जस्तो ठानेको उपाध्यक्ष अर्यालको भनाइ थियो । उहाँले भन्नुभयो, “हरेकले आफ्नो पदको गरिमा राख्नुपर्छ। म उपाध्यक्ष भएर आफ्नो भूमिका बिर्सिएँ भने राम्रो गर्दैन।”
