चैतारा । सिन्धुपाल्चोकको पाँचपोखरी थाङपाल गाउँपालिका लाँगर्चेस्थित ओखरेनी डाँडा पछिल्लो समय आन्तरिक एवं बाह्य पर्यटकको आकर्षक गन्तव्य बन्दै गएको छ ।
समुद्री सतहबाट २२५० मिटरको उचाइमा रहेको सो स्थललाई भूकम्पपछि पुन:निर्माण गरी सुन्दर बस्ती बनाइएको थियो । बौद्धमार्गीको बसोबास रहेको यस क्षेत्रमा सेता आकर्षक गुम्बा र स्तूपा छन् । यसले यहाँको सुन्दरतालाई थप अब्बल बनाएको छ ।
बाटैभरी टाँगिएका ध्वजापताका, वरिपरि राता जस्ताका एकैनाश घर, बस्तीको बीचमा रहेको ३५ फिट अग्लो सुन्दर बुद्धमूर्तिका तथा हरेक बिहान देखिने लाङ्टाङ हिमालले यो गाउँलाई थप आकर्षित बनाएको छ । साथै पुस, माघमा बाक्लो हिउँ पर्ने भएकाले पनि यहाँ पर्यटकको आकर्षण झन बढेको छ ।
प्राकृतिक दृश्यका लागि मात्रै नभई अर्गानिक खाद्य तथा नगदेबालीका लागि पनि ओखरेनी प्रख्यात छ । यहाँ आलु, मुला, धान उत्पादन हुन्छ । चिसो ठाउँ भएकाले यहाँ धान नौ महिनामा मात्रै पाक्छ । जङ्गली बँदेलले दु:ख दिन थालेपछि किसानले आलु, मुला लगाउन विस्तारै छाडेका छन् । “यसको विकल्प अहिले किबी खेती सुरु गरिएको छ । गाउँमा अहिले तीन हजारभन्दा बढी बिकीका बिरुवा रोपिएका छन्”, स्थानीय विद्यालयकी शिक्षिका शान्ति शेर्पा भन्नुभयो ।
लाङ्टाङ राष्ट्रिय निकुञ्जभित्र पर्ने भएकाले यो गाउँमा पाइने बँदेल, मृग, कालिज मार्न प्रतिबन्ध छ । त्यसैले पनि स्थानीयवासीले अन्य बालीको विकल्पमा किबी रोजका हुन् । यहाँको हावापानीअनुसार किबीको उत्पादन राम्रो हुने भएकाले पालिकाले पनि बिकी पकेट क्षेत्र घाषणा गरेर किसानलाई प्रोत्साहन गरेको स्थानीय बताउँछन् ।
यहाँ आउने आगन्तुकलाई सम्मानका साथ घरमा नै बास दिने गरिन्छ । पछिल्लो समय यहाँ पर्यटकको चासो बढ्न थालेपछि होमस्टेको तयारीमा छन् स्थानीयवासी । “हामी होमस्टेको तयारीमा छौँ, हामी कर तिर्छौं, त्यसका लागि गाउँपालिकाले सहयोग गर्नुपर्छ”, स्थानीयवासी पदमबहादुर लामाले भन्नुभयो । अहिले ठाउँ अभावका कारण ठूलो सङ्ख्यामा आउने पाहुनालाई रातको समयमा छुट्टाछुट्टै स्थानमा राख्नुपर्ने बाध्यता रहेको उहाँले बताउनुभयो ।
काठमाडौँको साँखुदेखि ५८ किलोमिटरको दू्रीमा पर्ने ओखरेनी डाँडा आकर्षक गन्तव्यस्थल भए पनि ओझेलमा परेको छ । काठमाडौँ–बनेपा–पाँचखाल–जिरोकिलो–मेलम्ची–नवलपुर–गुफाडाँडा हुँदै ओखरेनी आएर बास बस्न सकिन्छ । जिल्ला सदरमुकाम चौताराबाट गौराती मन्दिर हुँदै स्याउले बजार पुगेर उकालो लागेपछि मनोरम दृष्य अवलोकन गर्दै सानो ओखरेनी पुग्न सकिन्छ । रासस
