काठमाडौं । राष्ट्रिय प्रजातन्त्र पार्टी (राप्रपा)ले बुधबार काठमाडौंमा एमसीसीको विरोध प्रदर्शनका क्रममा भएको प्रशासनिक दमनको निन्दा एवं भत्सर्ना गरेको छ।
बुधबार प्रदर्शनको क्रममा प्रशासनबाट भएको लाठीचार्ज, अश्रुग्यास र पानीको फोहराको प्रयोगबाट धेरै नेता, कार्यकर्ता घाइते भएको भन्दै उक्त घटनाको राप्रपाले भत्सर्ना गरेको हो।
‘राप्रपाका विभिन्न २१ भातृ संगठनहरुले आज काठमाडौंमा गरेको शान्तिपूर्ण प्रदर्शनका क्रममा भएको प्रशासनिक दमनको राप्रपा निन्दा एवं भत्सर्ना गर्दछ ।’ सो पार्टीका प्रवक्ता मोहन श्रेष्ठद्वारा जारी विज्ञप्तीमा भनिएको छ।
राप्रपाले प्रदर्शनका क्रममा केन्द्रीय सदस्य एवं राष्ट्रिय प्रजातान्त्रिक विद्यार्थी संगठनका अध्यक्ष धनसुर शाही, कोषाध्यक्ष मदन शाही, पब्लिक युथ कलेजका इकाई अध्यक्ष सुसन पुलामी मगर सहित दर्जनौं कार्यकर्ताहरुलाई प्रहरीले पक्राउ गरेको जनाउँदै पक्राउ परेका सबैको अविलम्ब रिहाइको माग समेत गरेको छ।
