काठमाडौँ । आसन्न राष्ट्रपति तथा उपराष्ट्रपति निर्वाचन गराउने गरी उच्च अदालतका न्यायाधीश महेश शर्मा पौडेललाई निर्वाचन अधिकृत नियुक्त गरिएको छ ।
निर्वाचन आयोगले सोमबार अन्तर्राष्ट्रिय सम्मेलन केन्द्र, नयाँ बानेश्वरमा निर्वाचन अधिकृतको कार्यालय स्थापना गर्दै न्याय परिषद्को परामर्शमा पौडेललाई निर्वाचन अधिकृत नियुक्त गरिएको जानकारी दिएको छ ।
आयोगले अन्तर्राष्ट्रिय सम्मेलन केन्द्रलाई नै मतदानस्थल तोकी दुई वटा मतदान केन्द्र बनाउने भएको छ । संघीय संसद्का सदस्यले एउटा र प्रदेशसभाका सदस्यले अर्को मतदान केन्द्रबाट मतदान गर्ने व्यवस्था मिलाइने छ ।
आयोगका अनुसार राष्ट्रपति निर्वाचनका लागि फागुन १० गते मतदाता नामावली प्रकाशन, फागुन १३ गते उम्मेदवारी दर्ता, फागुन १६ गते उम्मेदवारको अन्तिम नामावली प्रकाशन र फागुन २५ गते मतदान हुने कार्यसूची छ ।
त्यस्तै राष्ट्रपति निर्वाचन सकिएपछि फागुन २७ गते उपराष्ट्रपति निर्वाचनका लागि उम्मेदवारी दर्ता गरिने र चैत ३ गते मतदान हुने आयोगले जनाएको छ ।
