एजेन्सी । स्पेनिस फुटबल लिग ला लिगा अन्तर्गत बार्सिलोनाले सहज जित निकालेको छ । आइतबार राति भएको खेलमा बार्सिलोनाले काडिजलाई २–० गोलले पराजित गरेको हो ।
घरेलु मैदान क्याम्प नोउमा बार्सिलोनालाई जित दिलाउन खेलको ४३ औं मिनेटमा सर्जियो रोबर्टोले तथा पहिलो हाफको इन्जुरी समयमा रोबर्ट लेवान्डोस्कीले गोल गरे । यसरी दुबै गोल पहिलो हाफमा सम्भव भएको थियो । जितसँगै बार्सिलोना २२ खेलबाट ५९ अंकसहित शीर्षस्थानमा यथावत छ । पराजित काडिज समान खेलबाट २२ अंकसहित १५ औं स्थानमा रहेको छ ।
यस्तै, गएराति नै भएको अर्को खेलमा एट्लेटिको मड्रिडले एट्लेटिको विल्वाओलाई १–० गोलले पराजित गर्यो । एट्लेटिको मड्रिडलाई जित दिलाउन एकमात्र निर्णायक गोल एन्टोनी ग्रिजमनले गरे । उनले ७३ औं मिनेटमा गोल गरेका हुन् । एट्लेटिको मड्रिड २२ खेलबाट ४१ अंकसहित चौंथो स्थानमा रहँदा एट्लेटिको विल्वाओ ३२ अंकसहित सातौं स्थानमा रहेको छ ।
