काठमाडौँ । सांसद चन्द्र भण्डारीकी आमा हरिकला भण्डारीको निधन भएको छ ।
ग्यास सिलिन्डर विस्फोटमा घाइते हुनुभएकी आमा हरिकलाको कीर्तिपुर अस्पतालमा निधन भएको हो ।
मेडिकल डाइरेक्टर डा निजिना ताम्राकारका अनुसार आज बिहान १०ः५७ मा उहाँको निधन भएको हो । उहाँ ८९ वर्षको हुनुहुन्थ्यो ।
बुद्धनगरस्थित निवासमा बुधबार राति ग्यास सिलिन्डर विस्फोट हुँदा आमासँगै सांसद भण्डारी गम्भीर घाइते हुनुभएको थियो । सांसद भण्डारीको पनि सोही अस्पतालमा उपचार भइरहेको छ । थप उपचारका लागि उहाँलाई भारत लैजाने तयारी भइरहेको छ ।
यसैबीच नेता भण्डारकिो स्वास्थ्य अवस्था बुझ्न कीर्तिपुरस्थित बर्न अस्पताल पुग्नुभएका स्वास्थ्य तथा जनसंख्यामन्त्री पदम गिरीले भण्डारीलाई थप उपचारका लागि भारतको मुम्बईस्थित नेसनल बर्न सेन्टरमा लैजान लागिएको जानकारी दिनुभएको छ ।
चिकित्सकको सल्लाहअनुसार भारतमा उहाँको उपचार गराउँदा स्वास्थ्यमा सुधार आउने अपेक्षा गरिएको छ । यद्यपि नेता भण्डारीले भने यहीँ उपचार गर्न पाए हुने इच्छा व्यक्त गर्नुभएको मन्त्री गिरीले बताउनुभयो ।
चिकित्सकका अनुसार सांसद भण्डारीको शरीर २५ देखि ३० प्रतिशत जलेको छ । श्वास नलीबाट धुवाँ गएकाले फोक्सोमा असर पुगेको हुनसक्ने भन्दै चिकित्सकहरुले त्यसको असर अझै तीन चारदिन बढी देखिने छ ।
