एजेन्सी । च्याम्पियन्स लिगको प्रि-क्वाटरफाइनल अन्तर्गत इंग्लिस क्लब लिभरपुलले जित निकालेको छ।
बुधबार राति भएको पहिलो लेगमा लिभरपुलले इटालियन क्लब इन्टर मिलानलाई उसकै मैदानमा २-० गोलले पराजित गरेको हो।
लिभरपुललाई जित दिलाउन खेलको ७५ औं मिनेटमा रोबर्टो फिर्मिनोले र ८३ औं मिनेटमा मोहमद सलाहले गोल गरे।
अब दोस्रो लेगको खेल लिभरपुलको मैदानमा मार्च ८ को मध्यरातमा हुनेछ।
यस्तै, बुधबार राति नै भएको अर्को खेलमा जर्मन क्लब बायर्न म्युनिखले अष्ट्रियन क्लब आरबी साल्जवर्गसँग बराबरी खेलेको छ।
साल्जवर्गको मैदानमा भएको अन्तिम १६ को पहिलो लेगमा दुबै टिमले १-१ गोलको बराबरी खेलेका हुन्।
खेलको २१ औं मिनेटमा चुकुविक अडामुले गोल गर्दै साल्जवर्गलाई सुरुवाती अग्रता दिलाएका थिए। खेलको ९० औं मिनेटमा किंग्सले कोमानले गोल गर्दै बायर्नलाई बराबरीमा ल्याए।
अब यी दुई टिमबीचको दोस्रो लेग मार्च ९ मा मध्यरातमा बायर्नको मैदानमा हुनेछ।
