काठमाडौं । आईसीसी विश्वकप क्रिकेट लिग टू अन्तर्गत त्रिकोणात्मक एकदिवसीय अन्तराष्ट्रिय सिरिजमा जर्ज मुन्सेको सानदार शतकमा स्कटल्याण्डले नामिबियालाई पराजित गरेको छ ।
त्रिवि मैदानमा भएको खेलमा स्कटल्याण्डले नामिबियालाई १० विकेटले पराजित गरेको हो । नामिबियाले दिएको १ सय ५४ रनको लक्ष्य पछ्याएको स्कटल्याण्डले २२.१ ओभरमा शून्य विकेट गुमाउँदै जित हात पार्यो ।
स्कटल्याण्डको जितमा जर्जि मुन्सेले ६१ बलमा १२ चौका र ७ छक्काको सहयोगमा अविजित १ सय ३ रनको शतकीय ईनिङ खेले । यस्तै, कोट्जरले ७२ बलमा ७ चौका सहयोगमा अविजित ४६ रनको यागदानी दिए ।
त्यसअघि पहिले ब्याटिङ गरेको नामिबियाले ३९.२ ओभरमा अलआउट भएर १ सय ५३ रन जोडेको थियो । नामिबियाका लागि लोह्यान्डरी लोरेन्सले ५४ रन जोड्दा बेर्नाड स्कोल्टेजले ३० रन बनाए । यस्तै, जान ग्रिनले २५ रन जोडे भने प्रिन्कि फ्रान्सले ११ रन बनाए ।
स्कटल्याण्डका मिचेल लेक्सले ४ तथा सफियान सरिफ र मार्क वाटले समान ३/३ विकेट लिए ।
सात टोली सहभागी विश्वकप लिग टूमा जितसँगै स्कटल्याण्ड ३३ खेलमा ४८ अंकका साथ अंक तालिकाको शीर्ष स्थानमा रहेको छ ।
नामिबिया भने ३२ खेलमा ३७ अंकका साथ अंक तालिकाको तेस्रो स्थानमा रहेको छ । स्कटल्याण्ड आगामी जुनमा जिम्बाबेमा हुने आईसीसी एकदिवसीय विश्वकपको छनोटमा स्थान बनाई सकेको छ ।
मंगलबारबाट सुरु त्रिकोणत्मक सिरिज फागुन ९ गतेसम्म हुनेछ । सिरिजमा सहभागी तीनवटै टिमले एक अर्काविरुद्ध समान २/२ खेल खेल्नेछन् ।
सिरिज अन्तर्गत नेपालले दोस्रो खेलमा स्कटल्याण्डसँग फागुन ५ मा खेल्नेछ । यस्तै नेपालले फागुन ६ मा नामिबियासँग दोस्रो खेल खेल्दा स्कटल्याण्डसँग पुनः फागुन ९ मा खेल्नेछ ।
