काठमाडौँ । राप्रपा नेपालका अध्यक्ष कमल थापाले श्रमिकहरुलाई पार्टीले सत्तामा जाने भर्याङ मात्र बनाउने गरेको वास्तविक मजदुर हक हितमा काम गर्न नसकेको विचार व्यक्त गरेका छन् ।
पार्टी सम्द्धव ट्रेड युनियन महासंघ नेपाल (टुकोन) को बैठकलाई सम्बोधन गर्दै थापाले श्रमिकहरु धेरै दुख गर्दा पनि परिवार धान्न धौ-धौ को अवस्थाबाट गुज्रिएको भन्दै उनिहरुको पक्षमा काम गर्न भन्दा ठुला भनिने दलका संगठनहरुले राजनीति मात्र बढी गर्न खोजेको समेत आरोप लगाए ।
तलव, सुविधा,स्वास्थ , बिमा जस्ता बिषयमा ध्यान केन्द्रित गरुपर्नेमा राजनितिक फाईदा मात्र लिने उदेश्यले मजदुर संगठन क्रियाशिल हुन नहुने भन्दै थापाले टुकोनले वास्तविक मजदुरको हक , हितमा काम गर्दै संगठन निर्माणमा केन्द्रित हुन निर्देशन दिए ।
बैठकले मुलुकका ७७ वटै जिल्लामा टुकोन युथ काउन्सिल गठन गर्ने निर्णय गरेको छ । युवा श्रमिकहरुलाई लक्षित गरेर टुकोनले संगठन विस्तार गर्न लागेको हो ।
ट्रेड युनियन महासंघ नेपाल (टुकोन)का अध्यक्ष हिक्मत जंग भण्डारीको अध्यक्षतामा आज सम्पन्न केन्द्रीय कार्य समितिको बैठकले श्रमिकहरुको हकहितको लागि देशव्यापी आन्दोलनमा उत्रने निर्णय समेत गरेको छ ।
आन्दोलनकै पूर्व तयारी स्वरुप संगठनलाई देशव्यापी बनाउन सातवटै प्रदेश कार्य समितिलाई निर्देशन दिएको टुकोनले संगठित एवं असंगठित श्रमिकहरुलाई न्याय दिलाउन कुनै कसर बाँकी नराख्ने टुकोनका अध्यक्ष हिक्मत जंग भण्डारीले बताएका छन् ।
श्रमिकहरुको नाममा दर्जनौं ट्रेड युनियन महासंघहरु खुले पनि अमुक पार्टीलाई सत्तामा पुर्याउने भर्याङको रुपमा मात्र प्रयोग भएकाले वास्तविक श्रमिकहरुको मुद्धालाई ओझेल पर्न नदिन टुकोन अझ क्रियाशिल भएर अघि बढ्ने भण्डारीको तर्क छ ।
टुकोनले मर्यादित ट्रेड युनियन आन्दोलनलाई व्यवस्थित गर्दै श्रमिकहरुको न्यूनतम पारिश्रमिक वृद्धि एवं सामाजिक सुरक्षा कोषलाई अक्षरस लागू गर्न जोडदार माग गरेको छ ।
