धनगढी । नेकपा (एकीकृत समाजवादी) का अध्यक्ष माधवकुमार नेपालले सुदूरपश्चिम प्रदेशमा आफ्नो पार्टीको आवश्यकता महसुस भएजस्तै अन्य ठाउँमा पनि हुने विश्वास गर्नुभएको छ ।
पार्टीको सुदूरपश्चिम प्रदेश कमिटीको बैठकमा भाग लिन धनगढी पुग्नुभएका नेपालले समाजवादी प्रेस संगठनले गरेको पत्रकार सम्मेलनमा एकीकृत समाजवादीप्रति सबैतिर सबैले आवश्यकता महसुस गर्नुपर्ने बताउनुभयो ।
शक्ति सन्तुलनमा एक जना व्यक्तिले पनि धेरै फरक पार्ने उहाँको भनाइ थियो । सुदूरपश्चिम प्रदेशसभामा रहेका पार्टीका प्रदेशसभा सदस्यलाई सम्बोधन गर्दै उहाँले भन्नुभयो, “सुदूरपश्चिम प्रदेशसभामा तपाईंहरु चार जना हुनुहुन्छ । मन खुम्च्याउने काम नगर्नुस् । यहाँको सरकारमा हाम्रो पनि सहभागीता हुनु राम्रो कुरा हो ।”
अन्य स्थानमा पनि हाम्रो आवश्यकता समयमै महसुस गरुन् भन्दै उहाँले अवमूल्यन, अपमान, बेवास्ता कसैले गर्न नहुने उल्लेख गर्नुभयो । उहाँले भन्नुभयो, “हामी पनि कोही हौँ भन्ने कुरा जबसम्म कार्यकर्ता र जनताले महसुस गर्दैनौँ तबसम्म संगठन निर्माणमा लागिरहनुपर्छ ।”
राष्ट्रपति निर्वाचनका सन्दर्भमा उहाँले राष्ट्रिय सहमति अहिलेको आवश्यकता हो भन्नुभयो । राष्ट्रपतिमा तपाईंको पनि नाम चलेको छ नि भन्ने पत्रकारहरुको जिज्ञासामा उहाँले आफ्नो इच्छा मात्र भएर केही नहुने बताउनुभयो ।
पूर्वप्रधानमन्त्री समेत रहनुभएका अध्यक्ष नेपालले टीकापुर घटनामा दोषी ठहर भई डिल्लीबजारस्थित कारागारमा रहेका रेशम चौधरीलाई रिहा गर्नुपर्ने बताउनुभयो । बताएका छन् । उहाँका अनुसार रेशम मात्र नभएर माओवादी शान्ति प्रक्रियासँग जोडिएका कुराहरु, विप्लवहरुका मुद्दाजस्ता राजनीतिक प्रकृतिका मुद्दालाई छिटो टुंगोमा पुर्याउन आवश्यक छ ।
वैचारिक शक्तिहरुबीच पार्टी एकता गर्ने पार्टीको नीति भएको उल्लेख गर्दै अध्यक्ष नेपालले एकताका लागि विभिन्न दलहरुसँग संवाद भइरहेको जानकारी दिनुभयो । नेकपा (एमाले)सँग पार्टी एकताबारे सोधिएको प्रश्नमा उहाँले एउटा हातले मात्र ताली नबज्ने टिप्पणी गर्नुभयो ।
उहाँले भन्नुभयो, “ताली बजाउन दुई वटा हात चाहिन्छ । हामीले मात्रै त्यतिकै हात उठाएर केही हुँदैन, हामी कुनै पनि कुरामा संकिर्ण छैनौँ, पूर्वाग्रह राख्दैनौँ, बदलाको भावना लिदैनौं। अरुको अपमान गर्दैनौँ, खिल्ली उडाउदैनौँ हाम्रो आफ्नै किसिमको संस्कार छ त्यहीअनुसार व्यवहार गछौँ ।”
