कैलाली । सुदूरपश्चिम प्रदेशका नवनियुक्त मुख्यमन्त्री कमल शाहले कारागारमा रहेका नागरिक उन्मुक्ति पार्टीका संरक्षक रेशम चौधरीलाई रिहा गर्न सहयोग गर्ने बताएका छन् ।
कैलालीको जानकी गाउँपालिका ६, जगतपुरस्थित रेशम चौधरीको घरमा पुगेर मुख्यमन्त्री शाहले उनको रिहाईमा पहल गर्ने बताएका हुन् । मुख्यमन्त्रीले रेशमकी आमा सुल्फी देवी चौधरीलाई भेट्दै यस्तो प्रतिबद्धता जनाएका हुन् ।
मुख्यमन्त्री शाहले टीकापुरको घटनाले सामाजिक सद्भावमा ठेस पुगेको बताए । उनले भने ‘टीकापुरको घटनाले सामाजिक सद्भावमा ठेस पुर्याएको छ । हामी त्यसलाई पुरानै स्थितिमा ल्याउने प्रयास गरिरहेका छौँ । केन्द्र सरकारले रेशम चौधरीलाई छिटो रिहा गर्नुपर्छ । म त्यसको लागि लागिपरेको छु ।’
पुस २७ गते मुख्यमन्त्रीमा नियुक्त एमाले संसदीय दलका नेता राजेन्द्र रावलले बिहीबार संसदबाट विश्वासको मत लिन नसकेर पदमुक्त भएपछि राजीनामा दिएका थिए । रावलले राजीनामा दिएपछि कांग्रेस संसदीय दलका नेता शाह मुख्यमन्त्रीमा नियुक्त भएका थिए ।
