धरान। सुनसरीको धरान उपमहानगरपालिका–४ मा पुरुषको टाउको र खुट्टा भेटिएको ठाउँ नजिकै अर्को झोलामा शरीर पनि फेला परेको छ।
प्रहरीका अनुसार बुधबार जेब्रा झोलामा पुरुषको टाउको र खुट्टा भेटिएको स्थान नजिकै बिहीबार बिहान अर्को झोलामा शरीर भेटिएको होे।
बुधबार दिउँसो धरान भेडेटार जाने सडक खण्डको आपगाछी देखि ४ घुम्ती मास्तिर जेठमाने गोलाईको जङ्गलमा गोठाला र दाउरा खोज्न जानेले दुर्गन्ध आएको र जेब्रा झोलामा मानिसको खुट्टा बाहिर देखेपछि प्रहरीले खबर गरेका थिए।
घटना स्थलमा प्रहरी पुगेर हेर्दा जेब्रा झोलाभित्र टाउको र खुट्टा फेला पारेको सङ्घीय इकाई प्रहरी कार्यालय धरानका एसपी भीम दाहालले बताए।
आज बिहीबार बुधबारको घटना स्थलबाट करिब १ किलोमिटर माथि धरान भेडेटार सडक खण्डबाट करिब ३० मिटर भित्र खर्दु सामुदायिक वनको धर्रधरे जंगलमाअर्को झोलामा मानिसको हात नै बाहिर देखिने गरी अर्को जेब्रा झोला फेला परेको हो।
हिजो टाउको र दाहिने खुट्टा फेला परेको शवको पुरै शरीर फेला परेको थिएन। त्यही हिजो फेला परेको टाउको र खुट्टाको बडी हुन सक्ने सङ्घीय इकाई प्रहरी कार्यालय धरानका एसपी भीम दाहालले बताए।
प्रहरीले घटनास्थलमा पुगेर अनुसन्धान थालेको छ। यो हत्या प्रोफेसनल मर्डर हुन सक्ने प्रहरी अनुसन्धान बताउँछ ।
मानिसको हत्या गरेर शरीरलाई टुक्रा टुक्रा पारेर अलग अलग स्थानमा छर्नुले यो प्रोफेसनल मडर हुन सक्ने बताइएको छ ।
यद्यपि, अहिलेसम्म हिजो भेटिएको टाउको र खुट्टाको अहिले सम्म सनाखत हुन सकेको छैन। प्रहरीले कोही मानिस घरबाट सम्पर्क बाहिर रहेको बारेमा सोधी खोजी सुरु गरेको छ।
