काठमाडौँ । सत्ता गठबन्धन दल नेकपा (एमाले) का अध्यक्ष केपी शर्मा ओली नेतृत्वको उच्चस्तरीय राजनीतिक संयन्त्रको बैठकमा राष्ट्रिय स्वतन्त्र पार्टी (रास्वपा) लाई पुनः सरकारमा सहभागी हुन आग्रह गरिएको छ ।
प्रधानमन्त्री निवास बालुवाटारमा बसेको संयन्त्रको बैठकमा रास्वपालाई सरकारमा ल्याउने बारे पनि छलफलको एजेन्डा बनेको बताइएको छ । बैठकमा रास्वपा अध्यक्ष रवि लामिछानेले कुनै जवाफ नदिएको बताइएको छ । सरकारबाट बाहिरिए पनि रास्वपाले सरकारलाई दिएको समर्थन भने कायमै राखेको छ ।
बैठकमा एमाले अध्यक्ष ओली, प्रधानमन्त्री पुष्पकमल दाहाल प्रचण्ड, रास्वपाका सभापति लामिछाने र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन सहाभागी हुनुहुन्थ्यो । जनता समाजवादी पार्टी (जसपा), जनमत पार्टी र नागरिक उन्मुक्ति पार्टी (नाउपा) का नेता बैठकमा उपस्थित थिएनन् ।
आजको बैठकमा सरकारको पूर्णता र राष्ट्रपति निर्वाचनबारे छलफल हुने बताइएको थियो ।
