काठमाडौँ । भारतका प्रधानमन्त्री नरेन्द्र मोदीले संसदमा हालैको भाषणमा शाहरुख खानको फिल्म ‘पठान’ को तारिफ गरेका छन् ।
मोदीले संसदमा पठानको प्रशंसा गर्दै धेरै वर्षपछि श्रीनगरका थिएटरहरू हाउसफुल चलिरहेको बताए। ‘श्रीनगरका थिएटरहरू दशकौंपछि हाउसफुल भइरहेका छन्।’ मोदीले भने, ‘३२ वर्षपछि पठानकै कारणले त्यहाँका थिएटरहरू हर्षोल्लासले भरिएका छन् । शो हाउसफुल हुन थाले । वर्षौंपछि श्रीनगरको थिएटरबाहिर हाउसफुल बोर्ड राखिएको छ ।’
मोदीले आफ्नो संसदको भाषणमा पठानलाई जासूसी थ्रिलर भनेपछि शाहरुख खानका फ्यान र सिने दर्शकहरूबिच चर्चा बढ्न थालेको छ । मोदीको उक्त भाषणको भिडियो अहिले सोशल मिडियामा भाइरल भइरहेको छ ।
रिलिज भएको १५ दिन बितिसक्दा पनि पठानको क्रेज उत्तिकै रहेको छ । पठानले बक्स अफिस कलेक्शनमा विश्वभर ८६५ करोड कमाइसकेको छ । भारतमा पनि यसको कलेक्सनले ४५० करोड नाघेको छ । दर्शकको क्रेज देखेर भारतमा पठानको टिकट मूल्य समेत घटाइएको छ ।
