काठमाडौँ । नेकपा (माओवादी केन्द्र) ले पार्टी कार्यविभाजन गरेको छ । पुरानै कार्यविभाजनलाई निरन्तरता दिएको माओवादी केन्द्रले संगठन विभाग प्रमुखमा जनार्दन शर्मा र अर्थ तथा केन्द्रीय कार्यालय प्रमुखमा वर्षमान पुनलाई कायमै राखेको छ । शर्मा र पुन दुवै उपमहासचिव हुन् ।
पार्टी वरियतामा अध्यक्ष पुष्पकमल दाहाल प्रचण्डपछि वरिष्ठ उपाध्यक्षमा नारायणकाजी श्रेष्ठ र उपाध्यक्षहरुमा कृष्णबहादुर महरा, अग्निप्रसाद सापकोटा र पम्फा भुसाल रहनुभएको छ । महासचिवमा देवप्रसाद गुरुङ र उपमहासचिवहरुमा गिरिराजमणि पोखरेल, वर्षमान पुन, हरिबोल गजुरेल, जनार्दन शर्मा, शक्तिबहादुर बस्नेत र मातृकाप्रसाद यादव रहनुभएको छ ।
पार्टीको विसं २०७८ पुस दोस्रो साता काठमाडौँमा सम्पन्न आठौँ महाधिवेशनले कार्यविभाजनको निर्णय गरेको थिएन । यही माग १२ गतेदेखि २१ गतेसम्म बसेको स्थायी समितिको बैठकले पुरानै कार्यविभाजन कायम गरेको हो ।
