काठमाडौँ । सन् २०३० को विश्वकप फुटबल आयोजना गर्न दक्षिण अमेरिकाको विश्व च्याम्पियन चार राष्ट्रले संयुक्त दावी पेश गरेको छ ।
विश्वकप आयोजनाका लागि अर्जेन्टिनासँगै चिली, उरुग्वे र पाराग्वेले आधिकारिक रूपमा आफ्नो संयुक्त प्रस्ताव पेश गरेका हुन् ।
सन् १९३० मा पहिलोपटक उरुग्वेमा विश्वकपको आयोजना भएको थियो । यससँगै सन् २०३० मा विश्वकप आयोजना भएको १ सय वर्ष पूरा हुनेछ । सोहि कारणले चार दक्षिण अमेरिकी राष्ट्रहरूले विश्वकपलाई ‘फुटबलको जन्म भएको ठाउँमा’ फर्कन आह्वानसहित सो प्रस्ताव पेश गरेका हुन् ।
दक्षिण अमेरिकी फुटबल संघ (कन्मेवल) का अध्यक्ष अलेजान्ड्रो डोमिन्गुएजले २०३० को विश्वकप सामान्य विश्वकप मात्र नभएर १ सय वर्षको उत्सव पनि हुने बताएका छन् । ‘सन् २०३० को विश्वकप अर्को विश्वकप मात्र होइन, यो १ सय वर्षको लागि मान्यताको साथ उत्सवको योग्य छ ।’ उनले भने, ‘हामी विश्वस्त छौं कि हामी भन्दा पहिले आएका र महानतामा विश्वास गर्ने र पहिलो विश्वकप बनाउनेहरूको सम्झनालाई सम्मान गर्न फिफाको दायित्व छ ।’
अर्जेन्टिना फुटबल संघ (एएफए) का अध्यक्ष क्लाउडियो तापियाले विश्व च्याम्पियनको रूपमा दक्षिण अमेरिकामा अब विश्वकप आयोजना हुनुपर्ने बताएका छन् । ‘यो विश्वकप आयोजना भएको १ सय वर्ष पूरा हुनलागेको अवसरमा मात्र होइन । हामी फुटबलकै कारण यहाँ छौं । हाम्रो निरन्तर दावी रहनेछ ।’ अध्यक्ष तापियाले भने ।
यता, स्पेन, पोर्चुगल र युक्रेनले २०३० को विश्वकप आयोजनाका लागि यस अघि नै संयुक्त दाबी गरिसकेको छ ।
सन् २०२६ को विश्वकप भने अमेरिका, क्यानडा र मेक्सिकोमा संयुक्त रुपमा आयोजना हुँदैछ ।
