काठमाडौँ । नागरिक उन्मुक्ति पार्टीका सांसद अरुणकुमार चौधरी पक्राउ परेका छन् । अदालतबाट छ महिनाको कैद सजाय र रु ८ लाख १९ हजार रुपैयाँ जरिवाना फैसला भएका चौधरी अदालतको आदेशअनुसारको सजाय नभोगी प्रतिनिधिसभा सदस्यमा निर्वाचित भएको खुलेपछि उनलाई पक्राउ गरिएको हो ।
कैलाली क्षेत्र नं २ बाट निर्वाचित चौधरीले ट्र्याक्टरमा आगो लगाएको आरोपमा जिल्ला अदालत कैलालीले कैद तथा जरिवाना सजायको फैसला गरेको थियो । २०७४ सालमा लम्कीचुहा नगरपालिकाका प्रमुख र पछि प्रदेशसभा निर्वाचनमा पराजित भएका चौधरी नागरिक उन्मुक्ति पार्टीबाट कैलाली २ बाट प्रतिनिधिसभा सदस्यमा निर्वाचित भएका थिए ।
विसं २०६६ भदौ ३ गते कैलालीको गोरांगाबाट ढुंगा लिएर लम्की जाँदै गरेको ट्र्याक्टरमा आगो लगाएको भनी ट्र्याक्टरधनी मोतिपुरका महादेव बजगाईंले बलिया गाविस–३ का पर्शुराम चौधरी, अरुण चौधरी र वीरबहादुर चौधरीविरुद्ध मुद्दा दायर गरेका थिए ।
ट्र्याक्टर चालक साजन चौधरीले उनीहरुले आफूलाई लखेटेर ट्र्याक्टरमा आगो लगाएको बयान दिएका थिए । अदालतले गरेको फैसला गरेको एक दशकसम्म आरोपितहरु फरार थिए । दोषी ठहर भएकामध्ये वीरबहादुर चौधरी गत शुक्रबार पक्राउ परेका थिए । उनी पक्राउ परेलगत्तै फरार अर्का व्यक्ति सांसद चौधरी रहेको खुलेको थियो ।
