काठमाडौं । प्रहरीले प्रेमप्रसाद आचार्य आत्मदाह प्रकरणमा गैर आवासीय नेपाली सङ्घका संस्थापक अध्यक्ष तथा व्यवसायी उपेन्द्र महतोसँग बयान लिएको छ ।
नयाँ बानेश्वरस्थित संघीय संसद् भवनअगाडि आफैँलाई पेट्रोल छर्केर आत्मदाह गरेका आचार्यको परिवारजनले ‘आत्महत्या दुरुत्साहन’को मुद्दामा आरोप लगाएसँगै प्रहरीले अनुसन्धानमा आचार्यले उल्लेख गरेका व्यक्तिहरुसँग बयान लिन थालेको हो ।
प्रहरीले व्यवसायी महतोसँग मङ्गलवार बयान लिएको थियो । आत्मदाह गर्नु अघि आचार्यले सामाजिक सञ्जालमा व्यवसायी महतो र उनले सञ्चालन गर्दै आएको नेपाल ग्रामोद्योग कम्पनीले घिउ मगाएर म्याद गुज्रेपछि फिर्ता गरेको उल्लेख गरेर रकम निकासी नदिएको उल्लेख गरेका थिए ।
आत्मदाह गर्नुअघि आचार्यले सामाजिक सञ्जाल फेसबुकमा लामो स्टाटस लेखेका थिए जसमा उनले आफूले पाउनुपर्ने रकम नदिएको आरोप लगाएका व्यक्ति र संघ सस्थाहरुको नाम उल्लेख गरेका थिए । अनुसन्धानको क्रममा प्रहरीले सोमबार भाटभटेनी सुपरमार्केटका सञ्चालक मीनबहादुर गुरुङसँग बयान लिएको थियो ।
