काठमाडौँ । नेपाली कांग्रेसका महामन्त्री एवं सांसद विश्वप्रकाश शर्माले नेपाली कांग्रेसले प्रधानमन्त्रीलाई विश्वासको मत दिएर ढोक्सो नथापेको बताउनुभएको छ ।
प्रतिनिधिसभाको आजको बैठकमा उहाँले सभामुख पदका लागि कांग्रेसका उम्मेदवार ईश्वरी न्यौपानेको प्रस्तावकका रुपमा बोल्दै कांग्रेसले ढोक्सा थापेर माछा पार्ने प्रयास नगरेको बताउनुभयो । उहाँले बरु नेकपा (एमाले) का अध्यक्ष केपी शर्मा ओलीले प्रचण्डलाई कसिलो पिँजडामा राख्न खोजेको आरोप लगाउनुभयो ।
उहाँले भन्नुभयो, “म मेरै जिल्लाका श्रद्धेय नेताले माछा र ढोक्साको कथा सुनाएर कांग्रेसलाई ढोक्सा नथाप्न सुझाव दिनुभएको स्मरण गर्छु । कांग्रेसले माछा पर्छ भनेर ढोक्सा थापिरहेको छैन । बरु तपाईंले माछा पर्ने पिँजडा कसिलो पार्नुभएको छ । आफू प्रधानमन्त्री हुँदा आफ्नै अर्का अध्यक्षको उच्चस्तरीय संयन्त्रको प्रस्ताव अस्वीकार गर्ने तपाईं आज त्यही संयन्त्रमार्फत प्रधानमन्त्रीलाई पिँजडामा राख्दै हुनुहुन्छ ।”
सांसद शर्माले राष्ट्रपति र सभामुखमा कांग्रेसको दाबी रहेको स्पष्ट पार्नुभयो । प्रधानमन्त्रीलाई विश्वासको मत दिइरहँदा नेपाली कांग्रेसलाई अध्यक्ष ओलीले ढोक्सामा माछा पार्न खोजेको भनी व्यङ्ग्य गर्नुभएको थियो ।
तस्बिर :रत्न श्रेष्ठ-रासस
