काठमाडौँ । अष्ट्रेलियाले आगामी मार्चमा हुने अफगानिस्तानविरुद्धको एकदिवसीय सिरिज नखेल्ने भएको छ । अस्ट्रेलिया क्रिकेट बोर्डले एक विज्ञप्ती जारी गर्दै संयुक्त अरब इमिरेट्स (युएई)मा हुने अफगानिस्तानविरुद्धको पुरुष एकदिवसीय सिरिज नखेल्ने जानकारी गराएको हो ।
अफगानिस्तानमा हाल तालिवानको शासन चलिरहेको छ। तालिवानले अफगानिस्तानका महिला र केटीहरूमा धेरै प्रतिबन्धहरू लगाएका छन्। उनीहरुलाई पढाइसँगै घरबाहिर काम गर्ने अधिकार छैन । केटीहरूलाई खेलकुदमा भाग लिन पनि प्रतिबन्ध लगाइएको छ। तालिवानको सो निर्णयको विरोधमा अस्ट्रेलियाले अफगानिस्तानसँगको सिरिज नखेल्ने निर्णय गरेको उक्त विज्ञप्तीमा उल्लेख गरेको छ।
‘क्रिकेट अस्ट्रेलिया अफगानिस्तानसहित विश्वभरका महिला र पुरुषहरूको लागि खेलको विकास गर्न सहयोग गर्न प्रतिबद्ध छ,’ विज्ञप्तीमा भनिएको छ ‘देशमा महिला र बालिकाहरूको लागि सुधारिएको अवस्थाको प्रत्याभुत भएमा अफगानिस्तान क्रिकेट बोर्डसँग साझेदारी जारी रहने छ ।’
अष्ट्रेलिया र अफगानिस्तानबीच तीन खेलको एकदिवसीय सिरिज हुने तालिका रहेको थियो ।
