काठमाडौं । प्रधानमन्त्री शेरबहादुर देउवाले प्रतिनिधि सभामा आज विश्वासको मत लिँदै हुनुहुन्छ । आज बस्ने संसदको दोस्रो बैठकमा विश्वासको मत लिने हुनुभएको हो ।
देउवा सरकारलाई समर्थन गर्न दुई खेमामा विभाजित भएको नेकपा एमालेका संस्थापन पक्ष अर्थात अध्यक्ष केपी शर्मा ओलीले विश्वासको मत नदिने बताउँदै गर्दा वरिष्ठ नेता माधव कुमार नेपाल समूहकी नेतृ रामकुमारी झाँक्रीले भने विश्वासको मतको पक्षमा भोट हाल्ने बताउनुभएको छ ।
"हामीले ७६(५) को प्रमको लागि संघिय संसदका माननीय सदस्य शेरबहादुर देउवालाई समर्थन गरेका थियौँ। १४९ जनाको समर्थन हुँदा पनि राष्ट्रपतिबाट नियुक्ति नभएपछि १४६ जना सदस्यहरू सर्वोच्च अदालतको ढोका ढकढकाउन पुगेका हौँ।" नेतृ झाँक्रीले भन्नुभएको छ, "अदालतले परमादेशको आदेश जारी गरेपछि बनेको सरकार र प्रधानमन्त्रीलाई विश्वासको मत दिनु हाम्रो कर्तव्य हो। सकिन्छ नेकपा एमालेले संस्थागत निर्णय गरी फ्लोरमा बसेर विश्वासको मतको पक्षमा भोट हालौँ। त्यसो गर्न सकिदैन भने सांसदहरूलाई संसदको पुरा कार्यकाल संचालन गर्न हामी सबैले विवेक प्रयोग गरी पक्षमा भोट हालौं। यदि त्यो पनि भएन भने हामी २३ जना निवेदककर्ताले भोट हाल्नु त हाम्रो कर्तव्य नै हो। हामीले विश्वासको मतको पक्षमा भोट हाल्नेछौं।"
