जनकपुरधाम । जनता समाजवादी पार्टी (जसपा) ले मधेस प्रदेशमा सरकार गठनको तयारी गरेको छ । जसपा प्रदेश संसदीय दलका नेता सरोजकुमार यादवले आज मुख्यमन्त्रीमा दाबी पेश गर्दै हुनुहुन्छ ।
सत्ता साझेदार दलहरुबीच भएको सहमतिअनुसार पहिलो चरणमा मेधस प्रदेशमा मुख्यमन्त्री जसपालाई दिइने भएको छ । सोही सहमतिअनुसार जसपा संसदीय दलका नेता यादवले मुख्यमन्त्रीमा दाबी पेश गर्न लाग्नुभएको हो । दोस्रो चरणको मुख्यमन्त्री जनमत पार्टीले पाउने सहमति भएको छ ।
मधेश प्रदेशमा सरकार गठनका लागि कुनै पनि दलसँग एकल बहुमत नभएकाले संविधानको धारा १६८ को उपधारा २ बमोजिम दुई वा दुईभन्दा बढी दलका सदस्यको समर्थनमा सरकार गठन गर्न लागिएको हो ।
एक सय ७ सदस्यीय प्रदेशमा बहुमतका लागि ५४ प्रदेशसभा सदस्यको समर्थन आवश्यक पर्छ । सत्ता गठबन्धनमा रहेका नेकपा (एमाले), नेकपा (माओवादी केन्द्र), जनमत पार्टी, राष्ट्रिय प्रजातन्त्र पार्टी (राप्रपा) र नागरिक उन्मुक्ति पार्टीसँग कूल ६२ सदस्य रहेका छन् । यसैबीच स्वतन्त्र प्रदेशसभा सदस्य सुरिता साहले पनि समर्थन गर्ने बताइएको छ ।
निवर्तमान प्रदेश सभामुख यादवले प्रदेशप्रमुख हरिशंकर मिश्रसमक्ष आजै मुख्यमन्त्रीमा दाबी पेश गर्नुहुने जनाइएको छ । प्रदेशप्रमुख मिश्रले सरकार गठनका लागि भोलि पुस २९ गते साँझ ५ बजेसम्मका लागि समयसीमा दिनुभएको छ ।
