काठमाडौँ । रिडी हाइड्रोपावर डेभलपमेन्ट कम्पनीका अध्यक्ष गुरुप्रसाद न्यौपानेलाई कुनै पनि सूचीकृत संस्थामा १० वर्षसम्म सञ्चालक बन्न नपाउने गरी प्रतिबन्ध लगाइएको छ ।
नेपाल धितोपत्र बोर्डले गैरकानूनी सेयर कारोबार गरेको भन्दै न्यौपानेलाई सो प्रतिबन्ध लगाउने गरी कारबाही गरेको हो । गैरकानूनी सेयर कारोबार गरेका न्यौपानेलाई कारबाही गर्नु नपर्ने कारणसहित स्पष्टीकरण सोधेको तर चित्तबुझ्दो जवाफ नआएको भन्दै कारबाही गरिएको बोर्डका अध्यक्ष रमेश हमालले जानकारी दिनुभएको छ ।
गत मंसिर २५ गते बसेको बोर्डको सञ्चालक समितिको बैठकले न्यौपानेसहित नेपाल हाइड्रो डेभलपरका तत्कालीन अध्यक्ष ज्ञानेन्द्रलाल प्रधानलाई कारबाही गर्न निर्णयसहित सिफारिस गरेको थियो ।
न्यौपानेले रिडी हाइड्रोपावर कम्पनी लिमिटेडको सञ्चालक समितिमा भएको समयमा एकाघरका परिवारका सदस्यको नाममा भएको सेयर बिक्री गरेको बोर्डले गरेको अनुसन्धानबाट पुष्टि भएको थियो ।
न्यौपानेलाई धितोपत्रसम्बन्धी ऐन, २०६३ को दफा १०१ अनुसार रु ७५ हजार नगद जरिवानासमेत गरिएको छ । सोही ऐनअनुसार न्यौपानले अब कारबाहीको १० वर्ष अवधि पूरा नभएसम्म कुनै पनि सूचीकृत कम्पनी वा संस्थाको सञ्चालक, महाप्रबन्धक वा सो सरहको पदमा बस्न पाउने छैनन् ।
बोर्डले न्यौपानेका छोरा बुहारीको विषयमा पनि अध्ययन गरिरहेको बोर्डका अध्यक्ष हमालले बताउनुभयो ।
नेपाल हाइड्रो डेभलपरका तत्कालीन अध्यक्ष प्रधानले भने देशबाहिर रहेकाले बोर्डको स्पष्टीकरणको चिठी बुझ्न ढिलो भएको बताइएको छ । प्रधानले मंगलबार साँझ बोर्डमा स्पष्टीकरणको पत्र बुझाएको समेत बताइएको छ ।
बोर्डका अध्यक्ष उनको पत्रको अध्ययन गरेर आवश्यक कारबाही गरिने बताउनुभएको छ ।
