काठमाडौँ । नेकपा (एकीकृत समाजवादी) अध्यक्ष माधवकुमार नेपालले आफ्नै नेता कार्यकर्ताहरुका कारण पार्टी राष्ट्रिय पार्टी बन्न नसकेको बताउनुभएको छ ।
युवा संघ नेपालले काठमाडौँमा आयोजना गरेको कार्यक्रममा उहाँले यद्यपि पार्टीले थ्रेसहोल्ड नकटाए पनि कुनै फरक नपर्ने बताउनुभयो ।
जनताको मत पार्टीको पक्षमा भए पनि पार्टीकै नेता कार्यकर्ताहरुले पार्टीको पक्षमा मत नहालेको उहाँको भनाइ थियो । “हामी आफ्नै कमजोरीले मत बाकसमा खसाल्न सकेनौँ, हाम्रै नेता कार्यकर्ताका कारण हामीले ३ प्रतिशत मत कटाउन सकेनौँ”, उहाँले भन्नुभयो ।
थ्रेसहोल्ड नकटाए पनि हामीलाई केही छैन भन्दै अध्यक्ष नेपालले भन्नुभयो, “थ्रेसहोल्ड पार गरेको भए हामीलाई हेलिकप्टर दिन्थ्यो कि हवाइजहाज दिन्थ्यो कि रु केही दिनेवाला थिए । पार्टी अफिस वा रकम दिने भन्ने पनि केही कुरा छैन ।”
राष्ट्रिय पार्टी नबने पनि पार्टीका सांसदहरुलाई ह्विप लाग्ने उहाँको भनाइ थियो । उहाँले पार्टीका नेता कार्यकर्ता एकजुट भएर लागेको भए २५ सिटको आसपास पुग्न सक्ने देखिएको उहाँले बताउनुभयो ।
“कतिपय देशमा त्यस्तो छ । सीटको आधारमा सरकारले नै रकम दिने व्यवस्था छ । तर, हामीकहाँ त्यो छैन । दर्ता भएको पार्टी भएकाले आफ्नो पार्टीका सांसदहरूलाई ह्वीप लाग्छ”, उहाँले भन्नुभयो । पहिला पनि त्यो नजिर स्थापित भइसकेको उल्लेख गर्दै उहाँले त्यस्तो भ्रममा नपर्न आग्रह गर्नुभयो ।
