काठमाडौँ । सुदूरपश्चिम प्रदेशमा सरकार गठनका लागि आह्वान गरिएको छ । प्रमुख देवराज जोशीले मंगलबार नै आह्वान गर्ने तयारी गरेपनि आज बुधबार विज्ञप्ती जारी गर्दै पुस २७ गते साँझ ५ बजेसम्मको समय निर्धारण गरेका हुन् ।
प्रदेशसभामा कुनै एक दलको बहुमत नभएकाले नेपालको संविधानको धारा १६८ को उपधारा (२) बमोजिम सुदूरपश्चिम प्रदेशको प्रदेशसभामा प्रतिनिधित्व गर्ने दुई वा दुईभन्दा बढी दलहरुको समर्थनमा बहुमत प्राप्त गर्न सक्ने प्रदेशसभाको सदस्यलाई मुख्यमन्त्री नियुक्त गर्नका लागि उनले सात दिनको समय सीमा राखेर आह्वान गरेका छन् ।
५३ सदस्य रहेको सुदूरपश्चिम प्रदेशसभामा बहुमतका लागि २७ सांसद आवश्यक पर्नेमा कांग्रेसका १९, माओवादी केन्द्रका ११, एमालेका १०, नागरिक उन्मुक्तिका ७, नेकपा एकीकृत समाजवादीका ४, राप्रपाका एक र स्वतन्त्र एक सांसद छन् ।
