काठमाडौ । नेकपा एमालेका अध्यक्ष केपी ओलीले पार्टी एकताका लागि हदैसम्मको लचिलो हुदै पार्टीमा दुई अध्यक्षको व्यवस्था गर्न आफू तयार रहेको जनाउ दिनुभएको छ ।
एमालेको जारी केन्द्रीय समितिको बैठकमा अध्यक्ष ओलीले पार्टी एकताका लागि आफू हदैसम्मको लचिलो हुने, पार्टीलाई २०७५ जेष्ठ २ को अबस्थामा फकाईउदै संगठनात्मक क्रियाकलापहरु अघि बढाउने, कार्यदलले सहमति गरेको १० बुँदे प्रस्ताबलाई कार्यन्वयन गर्ने तथा पार्टीमा दुई अध्यक्ष बनाउन आफू तयार रहनुभएको बताउनु भएको थियो ।
ओलीले राख्नुभएको प्रस्ताब बरिष्ठ नेता माधब नेपाल समक्ष एक नेताले पुर्याएका छन् । माधब नेपालको निकै निकट रहेका ती नेतासँगको छलफलपछि ओलीले आफ्नो धारणा सार्बजनिक गर्नुभएको एक नेताले जानकारी दिनुभयो ।
दिनदिनै नेता तथा कार्यकर्ताहरु एउटा समूह छाडेर अर्कोमा जाने, भातृसंगठनका नाममा सडकमा भैरहेको प्रदर्शन तथा बहुसंख्यक नेता तथा कार्यकर्ताबाट जुनसुकै मुल्य चुकाएर भएर पनि पार्टी एकता जोगाउनुपर्ने भाबनाका कारण पनि अध्यक्ष ओली र बरिष्ठ नेता नेपाल दवाबमा हुनुहुन्छ ।
ओलीलाई पार्टी बिभाजनको अपजसबाट जोगिनुपर्ने बाध्यता छ भने नेपाललाई पनि पार्टी बिभाजन गरेको आरोप आफूमाथि नलागोस भन्ने छ ।
जसका कारण एकले अर्कालाई गलाउने रणनीतिमा दुबै नेताहरु रहेका छन् । जारी संसद अधिबेशन रोकेर राजनीतिक दलसम्बन्धी अध्यादेश जारी गरी पार्टी बिभाजन गर्न सत्तारुढदलले आग्रह गरेपनि नेपालले ठोस जबाफ दिनु भएको छैन ।
सायद सत्तारुढ दलसँगको माधव नेपालको यो मौनतासँग यता अध्यक्ष ओलीको यो पछिल्लो लचकता मिल्न पनि सक्ने देखिन्छ । अनि पार्टीलाई फुट्नबाट जोगाउन सक्ने रसायन यो पनि हुनसक्ने देखिन्छ ।
उता प्रधानमन्त्री शेरबहादुर देउवाले घरै पुगेर सोध्दा पनि माधव नेपाल दल विभाजनसम्बन्धी अध्यादेशका लागि तयार नहुनु र यता अध्यक्ष ओली आज आएर जस्तोसुकै लचकता अपनाउन पनि तयार हुनुलाई संयोग पनि मान्न सकिन्छ ।
एमाले पार्टीका दुई अध्यक्ष यो गतिरोधको बटम लाइन पनि बन्न सक्ने देखिन्छ । सायद भित्री तयारी यो हुन पनि सक्दछ । यसका लागि दोस्रो तहका नेताहरुका प्रयास सार्थक बन्न पनि सक्छन् ।
