काठमाडौँ । उपप्रधान एवं गृहमन्त्री रवि लामिछानेले सरुवा, बढुवाका लागि नेताहरुको घर पुगेको थाहा पाए कारबाही गर्ने बताउनुभएको छ ।
गृहमन्त्री बनेपछि पहिलो पटक निरीक्षण गर्न प्रहरी प्रधान कार्यालय नक्साल पुग्नुभएका उहाँले प्रहरी कर्मचारीको सरुवा र बढुवा मापदण्डभन्दा बाहिर गएर नगरिने उल्लेख गर्नुभयो ।
“सरुवा र बढुवाको कुरा लिएर नेताको घरमा जाने कुरा अन्त्य गरिनेछ, हाम्रो भन्दा पनि राम्रो मान्छे प्राथमिकतामा पर्नेछन्”, उहाँले भन्नुभयो । राम्रो काम गर्नेलाई पुरस्कृत गरिने र आचरणविपरीत काम गर्नेलाई दण्डित गरिने उहाँको भनाइ थियो ।
उहाँले हिजोका दिनमा जे जे भए पनि आगामी दिनमा कसैले कानूनविपरीतका क्रियाकलाप नगरुन् भन्दै विकृति र विसंगति अन्त्य गरिने प्रतिबद्धता व्यक्त गर्नुभयो । प्रहरीभित्रका विकृति आफूले राम्ररी बुझेको उहाँको भनाइ थियो ।
आफूले कसैलाई दबाब नदिने र कानूनअनुसार मात्र काम गर्ने भन्दै उहाँले प्रहरीको सेवा, सुविधा, रासन र तलब स्केल सबैको पुनरावलोकन गरिने जानकारी दिनुभयो ।
सो अवसरमा प्रहरी महानिरीक्षक धीजप्रताप सिंहले प्रहरीमा सरुवा बढुवाका लागि मापदण्ड समेत बनाइएको र त्यसलाई अक्षरशः पालना गरिने जानकारी दिनुभयो ।
