काठमाडौँ । नवनियुक्त प्रधानमन्त्री पुष्पकमल दाहाल प्रचण्डले प्रधानमन्त्रीको सरकारी निवास बालुवाटारको लागि आवश्यक पर्ने सामानहरु खरिदमा मितव्ययिता अपनाउन निर्देशन दिनुभएको छ ।
आइतबार नेपालको ४४ औं प्रधानमन्त्रीमा नियुक्त हुनुभएका प्रचण्डले आज अपरान्ह ४ बजे पद तथा गोपनियताको शपथ लिँदै हुनुहुन्छ । प्रधानमन्त्री दाहाल आजै प्रधानमन्त्रीको सरकारी निवास बालुवाटार प्रवेश गर्ने कार्यक्रम रहेको छ ।
बालुवाटार प्रवेश गर्नुअघि प्रधानमन्त्री दाहालले बालुवाटारमा महँगो र भड्किला सामान नकिन्न आफ्नो सचिवालयलाई निर्देशन दिनुभएको हो ।
व्यवस्था बदलेको तर, अवस्था बदल्नको लागि आफू प्रधानमन्त्री हुनुपर्ने बताउँदै आउनुभएका प्रचण्डले महँगो र भड्किला सामान नकिन्न निर्देशन दिनुभएको हो । यसअघि प्रधानमन्त्री बन्दा महँगो खाट किनेको भन्दै प्रचण्डको आलोचना हुने गरेको थियो ।
