पोखरा । नेपाली कांग्रेसका महामन्त्री गगन थापाले अपमानित भएर आफू पोखरा आएको बताउनुभएको छ ।
पोखरामा जारी लिटरेचर फेस्टिभलमा ‘राजनीतिमा समाजको ऐना’ विषयक बहसमा सहभागी हुनुभएका थापालाई मोडरेटर बसन्त बस्नेतले ‘तपाईं हारेर आएको कि जितेर आएको’ भन्ने प्रश्नमा उहाँले भन्नुभयो, “म अपमानित भएर आएको हुँ ।”
महामन्त्री थापाले सत्ता गठबन्धनमा पार्टी सभापति शेरबहादुर देउवाले पार्टीमा छलफल गर्नुपर्छ भनेको सुनेपछि उहाँले कतिबेला बोलाउनुहुन्छ भनेर फोन कुरेर बसेको बताउनुभयो ।
संसदीय समितिमा दलको नेताबाहेक महामन्त्रीद्वय पदेन सदस्य रहेको बताउँदै उहाँले भन्नुभयो, “बिहान ६ बजेदेखि सभापतिको कल कतिखेर आउँछ भनेर कुरेर बसेको हुँ ।”
पार्टी कार्यालयमा कुनै छलफल नभएको र घरमा नबोलाई जान नमिलेको भन्दै उहाँले अपमानित भएर पोखरा आएको टिप्पणी गर्नुभयो । हारजितको प्रकरण सकिएकाले कांग्रेसलाई फेरि उठाउने उहाँको भनाइ थियो ।
