काठमाडौँ । शक्ति बाँडाफाँटका विषयमा छलफल गर्न सत्ता गठबन्धनको बैठकका लागि प्रधानमन्त्री निवास बालुवाटार पुगेका नेकपा (माओवादी केन्द्र) का अध्यक्ष पुष्पकमल दाहाल प्रचण्ड बैठकपछि बाहिरिनुभएको छ ।
प्रधानमन्त्री शेरबहादुर देउवासहित सत्ता गठबन्धनका शीर्ष नेताहरुसँग छलफल चलिरहेका बेला उहाँ बाहिरिनुभएको हो ।
प्रचण्ड नेकपा एमालेका अध्यक्ष केपी शर्मा ओलीलाई भेट्न बालकोट प्रस्थान गर्नुभएको हो ।
बालुवाटारमा बसेको बैठकमा नेपाली कांग्रेसले राष्ट्रपति र प्रधानमन्त्री दुवै पद छाड्न नसक्ने अडान लिएपछि प्रचण्ड बैठकबाट बाहिरिनुभएको थियो । उहाँ सिधै ओलीसँग छलफल गर्न बालकोट लाग्नुभएको स्रोतले बतायो ।
राष्ट्रपति विद्यादेवी भण्डारीले आज अपराह्न ५ बजेभित्र बहुमतसहित सरकारका नेतृत्वमा दाबी प्रस्तुत गर्न दलहरुलाई समयसीमा दिनुभएको छ । सोही समयभित्रै सहमति जुटाउने प्रयासमा गठबन्धनका नेताहरु सक्रिय छन् ।
यसअघि सरकारको नेतृत्वलाई लिएर अध्यक्ष प्रचण्ड र प्रधानमन्त्री देउवाबीच ‘वान टु वान’ वार्तासमेत भएको थियो ।
