काठमाडौँ । राष्ट्रिय स्वतन्त्र पार्टी (रास्वपा) ले सरकारमा सहभागी हुने वा नहुने भन्नेबारे निर्णय गर्न संसदीय दलको बैठक बोलाएको छ ।
सो पार्टीको संसदीय दलको बैठक आज दिउँसो १ बजे बसुन्धरामा बस्न लागेको हो । बैठकमा संसदीय दलको विधान मस्यौदा र नयाँ सरकार गठनका साथै समसामयिक विषयमा धारणा बनाउने बताइएको छ ।
पार्टी प्रवक्ता मुकुल ढकालका अनुसार बैठकमा सरकारमा सहभागी हुने वा नहुनेबारे छलफल हुनेछ । पार्टी अध्यक्ष रवि लामिछाने सरकारमा सहभागी हुने पक्षमा हुनुहुन्छ । सोही विषयमा औपचारिक निर्णय गर्न बैठक बस्न लागेको हो ।
प्रतिनिधिसभामा २० सिट रहेको सो पार्टीलाई सरकारमा सहभागी गराउँदा सत्ता गठबन्धनको स्पष्ट बहुमत नपुगेको अवस्थामा सरकार र संसद्को स्थायीत्वमा सहयोग पुग्ने मत नेपाली कांग्रेसभित्र देखिएको छ ।
